«ՀՆԱ աճի գրանցման դեպքում օրավարձով աշխատողների ստեղծած արդյունքը կա, իսկ նրանց աջակցելու ցանկություն չկա՞». Միքայել Մելքումյան

ՀՆԱ աճի գրանցման դեպքում օրավարձով աշխատողների ստեղծած արդյունքը կա, իսկ նրանց աջակցելու ցանկություն չկա՞: Նման հարցադրմամբ է ֆեյսբուքյան իր էջում հանդես եկել ԱԺ ԲՀԿ խմբակցության պատգամավոր Միքայել Մելքումյանը:

Նա, մասնավորապես, գրել է.

«Սիրելի’ հայրենակիցներ,

Սիրելի’ ժողովուրդ,

Այսօր բոլորս ապրում ենք դժվարին օրեր։ Իհարկե, համոզված ենք, որ հաղթահարելու ենք այս դժվարությունները։ Կարեւորը՝ չկորցնենք հավատը վաղվա լավ օրվա նկատմամբ։

Դրա հետ միասին կան որոշ դժվար լուծվող խնդիրներ, որոնց հետ կապված ես, որպես տնտեսագետ, կցանկանայի Ձեզ հետ կիսվել մտքերով։

Այսպես, ակնհայտ է, որ աշխարհում սպասվում է տնտեսության ռեցեսիա (կտրուկ անկում կամ կրճատում)։ Դրա մասին հայտարարում են Արժույթի միջազգային հիմնադրամը (ԱՄՀ), Համաշխարհային բանկը եւ այլ հեղինակավոր միջազգային կազմակերպություններ։

Խնդիրը անկման չափի, այսինքն՝ նաեւ դրա հետեւանքների մեջ է։ Հետեւանքներ ո’չ միայն տնտեսական, այլեւ՝ սոցիալական, հոգեբանական։ Ավելանալու է աղքատության մակարդակը, գործազրկությունը, եւ այլն։

Պարզ է, որ սպառման մակարդակը նաեւ մեր հանրապետությունում է կրճատվելու։ Իսկ քանի որ մենք առավելապես սպառող, քան կուտակող պետություն ենք եղել, ուստի առանց այդ էլ սոցիալական լրջագույն խնդիրներ ունեցող երկրում ճգնաժամի հարվածը ավելի ուժգին կարող է լինել։ Դա նշանակում է, որ սպառման ծավալի կրճատմանը զուգահեռ կնվազի նաեւ առաջարկը, այսինքն՝ արտադրության եւ առեւտրի ծավալները։ Սա՝ ներքին շուկայում։

Ուստի անհրաժեշտ է դանդաղեցնել սպառման մակարդակի կրճատումը մի կողմից, եւ մյուս կողմից՝ խթանել տեղական արտադրությունը եւ օգտագործել արտահանման բոլոր հնարավորությունները։

Այսպիսով, պետք է սոցիալական հարցերի լուծումը չհակադրել ձեռնարկատիրության խթանման խնդրին։

Եվ երբ «Բարգավաճ Հայաստան» կուսակցությունն ասում է, որ պետք է դրամական փոխհատուցում տալ նաեւ չգրանցված օրավարձով աշխատողներին, դա նշանակում է, որ մենք չենք կարող թույլ տալ, որ մեր հայրենակիցներն ունենան տարրական սննդի կամ դեղամիջոցների ձեռքբերման խնդիր։

Այո, այդ ինչպե՞ս է լինում, որ պետական բոլոր կառույցները խոսում են մեր պետության Համախառն ներքի արդյունքի (ՀՆԱ) մակարդակի եւ նրա աճի մասին, որտեղ ներառված է պաշտոնապես նաեւ այդ չգրանցված աշխատողների կողմից ստեղծված արդյունքը (կառույցներ, շենքեր, շինություններ, գյուղատնտեսական արտադրանք, ապրանքներ եւ ծառայություններ, եւ այլն), իսկ ահա, երբ հասել է նեղ օրերին նրանց աջակցելու ժամանակը, կարծես թե հրաժարվում ենք։

Չի կարելի։

Նաեւ օրավարձով աշխատող մեր հայրենակիցներն են շենացնում, ստեղծում մեր նոր պետությունը։

Մենք կառավարությանն առաջարկել ենք գործիքակազմ, թե ինչպես պետք է նույնականացնել մեր հայրենակիցների աշխատանքային գործունեությունը։ Դրա համար գործում է նույնիսկ Հայաստանի Հանրապետության կառավարության 2017 թ. համապատասխան որոշումը։ Մարդիկ գործատուների հետ ունեցել են համապատասխան հաղորդագրություններ, լուսանկարներ, թիմային են աշխատել, եւ այլն։ Ի վերջո, այդ մարդիկ գրանցված չեն, բայց հո գաղտնի չե՞ն աշխատել։

Օրինակ՝ մեր բոլորի բնակարաններում վերանորոգման տարբեր աշխատանքներ կատարող վարպետը որտե՞ղ պետք է գրանցվեր, կամ տաքսի ծառայության վարորդը, որի գործունեությունը հստակ գրանցվում է տաքսի ծառայության էլեկտրոնային տեղեկատվական համակարգում, բայց լիցենզիա չունի, հիմա գրանցվա՞ծ է, թե չէ։

Իհարկե, Աստված տա՝ մենք շուտ դուրս գանք այս իրավիճակից։ Բայց հստակ գիտակցենք, որ մարդկանց նվազագույն կենսամակարդակի պահպանումը նշանակում է պատվերներ տարբեր ոլորտների ձեռնարկություններին։ Եվ հակառակը։

Վերջում։

Չի կարելի թույլ տալ սպառման մակարդակի կտրուկ նվազում։ Սպառման կառուցվածքի մեջ որոշ տեղաշարժեր՝ այո, բայց սոցիալական կոլապս՝ ոչ։

Երկուշաբթի օրը «Բարգավաճ Հայաստան» կուսակցությունը շրջանառության մեջ կդնի առավել տուժած տնտեսության ոլորտների ձեռնարկությունների հարկային արձակուրդների մասին օրենքի նախագիծը, եւ ոչ միայն։

(շարունակելի)»: