«Արամ Օբելյանն ընդդեմ Նիկոլ Փաշինյանի» դատական գործը մակագրվել է դատավոր Ալեքսան Սուքոյանին
Ավելի վաղ տեղեկացրել էինք, որ «Կոնցեռն Դիալոգ» փաստաբանական ընկերության ավագ գործընկեր, փաստաբան Արամ Օրբելյանը հայցով դիմել էր դատարան՝ ընդդեմ ՀՀ վարչապետ Նիկոլ Փաշինյանի՝ զրպարտություն հանդիսացող տեղեկությունը հերքելու պահանջով:
Հայցադիմումը դատարանը ստացել է երեկ, և գործը մակագրվել է Երևան քաղաքի ընդհանուր իրավասության դատարանի դատավոր Ալեքսան Սուքոյանին:
Հայցը վարույթ ընդունելու, մերժելու կամ հետ ուղարկելու մասին որոշում դեռ չի կայացվել:
Հիշեցնենք, որ հայցադիմումի հիմքում ընկած է մարտի 10-ին Քաջարանում «Այո» քարոզարշավի ժամանակ վարչապետ Նիկոլ Փաշինյանի՝ Արամ Օրբելյանի հասցեին հնչեցրած տեղեկությունը, թե Արամ Օրբելյանը, որը հանդիսանում է Ռոբերտ Քոչարյանի պաշտպանը, «էն ժամանակներում, երբ մարտի մեկի հետ կապված գործ էր քննվում ՍԴ-ում, բազմիցս ելումուտ է արել Սահմանադրական դատարան», և նշել էր, որ Օրբելյանի ելումուտը սահմանված կարգով չի արձանագրվել: Փաշինյանը նաև ասել էր, որ «ոստիկանները բացատրություն են տվել, որ ՍԴ նախագահի օգնականը կամ աշխատակազմի ղեկավարն ասել է՝ շեֆի սանիկն է, թող գա, մի գրանցեք»:
