«Ձեր բոլոր հարցերի պատասխանները փնտրեք «Կարգին հաղորդման» սքեթչում». Նիկոլ Փաշինյանը՝ լրագրողին
Վարչապետ Նիկոլ Փաշինյանի խոսքով՝ ճիշտ չէ օգտագործել «հեղաշրջում» բառը, դրա փոխարեն ավելի ճիշտ է օգտագործել «ռևանշ» բառը: Նա փորձեց հերքել, թե ԱԽ քարտուղար Արմեն Գրիգորյանը իր խոսքում «հեղաշրջում» բառն է օգտագործել, սակայն, ինչպես հայտնի է՝ Ա. Գրիգորյանն ասել է՝ «հեղաշրջման փորձեր»:
«Ռևանշի փորձեր են եղել և այդ փորձի ողնաշարը ջարդված է և նման բան չի կարող լինել: Հեղաշրջման փորձ Հայաստանում չի եղել և չէր կարող լինել»,- այսօր Կապան քաղաքում հրավիրած մամուլի ասուլիսին ասաց վարչապետ Նիկոլ Փաշինայնը՝ անդրադառնալով այն խոսակցություններին, մասնավորապես Ազգային անվտանգության խորհրդի քարտուղար Արմեն Գրիգորյանի կողմից արված, թե Հայաստանում կանխվել է պետական հեղաշրջման փորձեր:
Անդրադառնալով ԱԱԾ պետական պահպանության ղեկավարին պաշտոնից հեռացնելուն և հարցին, թե նա և ԱԱԾ նախկին ղեկավար Արթուր Վանեցյանն արդյո՞ք որևէ առնչություն ունեն պետական հեղաշրջման փորձի հետ և կա՞ մի բան, որը Արթուր Վանեցյանը կարո՞ղ է հայտարարել և դրանից վարչապետը մտավախություններ ունի, Փաշինյանն ասաց.
«Ես նման եմ մարդու, որը կարող է որևէ բանից վախենալ, «Կարգին հաղորդման» մեջ տեսել եք, որ գալիս ասում է՝ ես ամեն ինչ գիտեմ, այնուհետև ասում է, թե ամեն-ամեն ինչ գիտեմ և վերջում հայտնվում է հիմար վիճակում: Հիմա բոլոր նրանք, որոնք ասում են, թե ամեն-ամեն ինչ գիտեն՝ իրենք ընդամենը հայտնվում է այդ սքեթչի հերոսի կարգավիճակում»:
Ինչ վերաբերում է Ա. Վանեցյանի «Կանգ առ» նախազգուշացմանը, վարչապետ Նիկոլ Փաշինյանն ասաց.«Յութուբում փնտրեք ու գտեք «Կարգին հաղորդման» այդ սքեթչը, ձեր բոլոր հարցերի պատասխաններն այնտեղ կա: Բազմաթիվ հարցերի պատասախններ այնտեղ կգտնեք»,- դիմելով լրագրողին՝ հորդորեց վարչապետ Նիկոլ Փաշինյանը:
