«Գալիս է մեծ տնտեսական դեպրեսիա, մենք խոցելի վիճակում ենք հայտնվելու». Ադիբեկյան
«Մասնագետները կարծում են, որ Ռուսաստանը փորձում է վերականգնել նախկին Սովետական Միությունը՝ մի քիչ այլ պայմաններում: Երբ նայում ենք Ռուսաստան-Բելառուս հարաբերություններին, ապա Բելառուսի Հանրապետությունն ասում է՝ եթե միասնական երկիր ենք, ապա գները պետք է լինեն նույնը: Նույն, ներքին գնով գնում է Ռուսաստանից, իսկ այլ երկրների վաճառում է միջազգային գնով, այսինքն՝ տարին մի քանի միլիարդ դոլար հենց այնպես աշխատում է»,- այսօր ասաց սոցիոլոգ Ահարոն Ադիբեկյանը՝ հավելելով, որ պետությունը պետք է օժանդակի, որպեսզի արևային էներգիայով տները տաքացնեն:
«Միջազգային արժութային հիմնադրամի տնօրենը հայտարարել է, որ գալիս է մեծ տնտեսական դեպրեսիա, մենք խոցելի վիճակում ենք հայտնվելու»,- նշեց սոցիոլոգը:
«Այլընտրանք» հասարակական կազմակերպության համանախագահ Նարեկ Մանթաշյանի կարծիքով՝ գազի գինը բարձրանում է հայ-ռուսական հարաբերությունների ֆոնին:
«Ռուսական կողմը Հայաստանին վստահելի գործընկեր չի համարում, չի տեսնում մարդկանց, որոնց հետ կարելի է քաղաքական առևտուր անել և հստակ տեսլական ունենալ: Կարելի է ասել՝ գազի գինը ռուսական կողմի որոշակի պատժամիջոցներից է՝ արտաքին քաղաքական կուրսին չտիրապետելու հետ կապված: Ամբողջ աշխարհում գազի գինը քաղաքական առևտրի բաղկացուցիչ մաս է»,- ընդգծեց Նարեկ Մանթաշյանը:
Հիշեցնենք՝ օրեր առաջ Հանրային ծառայությունները կարգավորող հանձնաժողովի նախագահ Գարեգին Բաղրամյանը հայտարարել էր՝ չի բացառվում, որ «Գազպրոմ Արմենիա» ընկերությունը հայտ ներկայացնի Հանրային ծառայությունները կարգավորող հանձնաժողով՝ սպառողի համար գազի սակագինը բարձրացնելու համար։
