«Ցանկացած բարձրաստիճան պաշտոնյայի հարազատ, գտնվելով սահմանին, այդ տեղը դարձնում է հավանական կրակակետ». Լիլիթ Թումանյան
«Ցանկացած բարձրաստիճան պաշտոնյայի հարազատ, գտնվելով սահմանին, իր վրա կրակ է հրահրում, այսինքն՝ այդ տեղը դարձնում է հավանական կրակակետ՝ հատկապես, երբ դա արվում է ոչ թե իսկապես այցելելու, ոգեշնչելու համար, այլ ընթացքում արվում է տեսանկարահանում, ֆոտոնկարահանում, և հետագայում հասկանում ենք, որ դա ավելի շատ PR կոմպոնենտ ունի, քան իրական հոգատարությունը, որովհետև իրական հոգատարությունը մարդիկ ի ցույց չեն դնում»,- լրագրողների հետ հանդիպման ժամանակ անդրադառնալով ՀՀ վարչապետ Նիկոլ Փաշինյանի տիկին Աննա Հակոբյանի սահման այցին՝ ասաց «Ադեկվատ» հ/կ նախաձեռնության անդամ, Հանրային ռադիոյի նախկին փոխտնօրեն Լիլիթ Թումանյանը:
«Մի կողմ դնենք մարդկային հատկանիշները, բայց սա վտանգավոր է, որովհետև, Աստված չանի, եթե վաղը-մյուս օրը կամ գիշերն իմանանք դիվերսիաների մասին՝ այդ հրապարակումների արդյունքում: Հակառակորդը հետևում է մեր ֆեյսբուքյան էջերին, մամուլին և օգտատերերի հրապարակումներին… Գուցե վաղը չէ մյուս օրն ակտիվ հրետակոծման ենթարկվի այն կետը, որտեղ գտնվում է բարձրաստիճան պաշտոնյա: Կարծում եմ՝ հնարավոր ռիսկերը, վտանգը թերագնահատված է»,- նշեց Լիլիթ Թումանյանը:
Անի Կարապետյան
