Թրամփը որոշեց պաշտպանել մարդու իրավունքները Հոնկոնգում: Պեկինը դժգոհ է
ԱՄՆ-ի նախագահ Դոնալդ Թրամփն ստորագրել է օրենքներ, որոնք պատժամիջոցների հնարավոր սահմանում են նախատեսում Հոնկոնգում մարդու իրավունքների խախտման կապակցությամբ: Պեկինն օրենքները որակել ԱՄՆ-ի «հեգեմոնիստական գործելակերպի» դրսեւորում, տեղեկացնում է BBC-ին:
Մեկնաբանների մեծամասնությունը օրենքները դիտարկում է որպես աջակցություն Հոնկոնգի դեմոկրատական շարժումներին: Նրանց կողմնակիցների ու ոստիկանության միջեւ բախումները Հոնկոնգի փողոցներում շարունակվում են արդեն մի քանի ամիս:
Ինչպես բացատրում է New York Times-ը, Թրամփի կողմից ստորագրված օրենքներից մեկը նախատեսում է անհատական պատժամիջոցների սահմանում Չինաստանի եւ նրա հատուկ վարչական շրջանի պաշտոնյաների նկատմամբ մարդու իրավունքների խախտման կապակցությամբ:
Բացի այդ, Պետդեպարտամենտն ամեն տարի հաստատելու է Հոնկոնգի՝ որպես ԱՄՆ-ի առեւտրական գործընկերոջ հատուկ կարգավիճակը: Ներկայում ինքնավար շրջանն օգտվում է արտոնություններից:
Թրամփի կողմից ստորագրված եւս մեկ օրենք արգելում է որոշակի կատեգորիայի ոստիկանական հանդերձանքի մատակարարումը Հոնկոնգին:
Պեկինում եւ Հոնկոնգում իշխանություններն օրինագծերը քննադատում էին դեռ դրանց քննարկման փուլում: Լույս նոյեմբերի 28-ի գիշերը ՉԺՀ-ի ԱԳ նախարարությունում հայտարարել են, որ Պեկինը «հեգեմոնիստական» էհամարում ԱՄՆ-ի գործելակերպը եւ սպառնացել է «լուրջ հակամիջոցներով»:
Հոնկոնգի վարչակազմը ԱՄՆ-ի գորողությունները որակել է միջամտություն ներքին գործերին եւ նշել է, որ օրենքների ընդունումը կարող է վնաս հասցնել երկկողմ հարաբերություններին:
