«Զարմանում եմ, որ զարմանում եք, երբ ընդդիմադիր Փաշինյանի և վարչապետ Փաշինյանի հայտարարություններն իրար չեն համապատասխանում». Գևորգ Գորգիսյան
168 TV-ի «Ռեվյու» հաղորդման հյուրը ԱԺ «Լուսավոր Հայաստան» խմբակցության պատգամավոր Գևորգ Գորգիսյանն է
– Պարո՛ն Գորգիսյան, Զագրեբում Եվրոպական Ժողովրդական կուսակցության համագումարի ժամանակ ելույթ ունեցավ ՀՀ 3-րդ նախագահ Սերժ Սարգսյանը, անդրադարձավ Արցախյան հիմնախնդրին և նշեց, որ Արցախյան հակամարտության ներկայիս բանակցային փուլն իր մոտ մտահոգություններ է առաջացնում: Որպես ԱԺ Պաշտպանության և անվտանգության հանձնաժողովի անդամ՝ ի՞նչ կասեք Երրորդ նախագահի մտահոգությունների վերաբերյալ, ի՞նչ փուլում է բանակցային գործընթացը։
– Զարմանում եմ, որ պարոն Սարգսյանն այդ մասին խոսում է, որովհետև իր ղեկավարած բանակցային գործընթացները մեզ բերեցին Ապրիլյան պատերազմ, որը քննող հանձնաժողով է ստեղծվել, և այնտեղ բազմաթիվ խնդիրներ են բացահայտվում, որոնց չլինելու պարագայում, մենք կարող է ունենայիք ավելի քիչ զոհեր, չկորցնեինք տարածքներ։
– Դուք Ապրիլյան պատերազմի քննիչ հանձնաժողովի անդամ եք. այդ հանձնաժողովը ստեղծվեց 6 ամսով, 6-ից արդեն 5 ամիսը գրեթե անցել է, ի՞նչ հասցրեցիք պարզել Ապրիլյան պատերազմի հետ կապված։
– Եղել են բազմաթիվ բացթողումներ, և մենք հիմա փորձում ենք հասկանալ, թե ում կողմից են դրանք եղել։ Հույս ունեմ, որ Սերժ Սարգսյանն ասելիք կունենա՝ որպես գլխավոր գերագույն հրամանատար։
– Իսկ ե՞րբ են նրան հրավիրելու հանձնաժողով։
– Ժամկետներ հայտնի չեն դեռ։
– Ապրիլյան պատերազմի վերաբերյալ ընդդիմադիր պատգամավոր Նիկոլ Փաշինյանն ասում էր, որ այն պայմանավորված էր. եթե Ձեր հանձնաժողովը աշխատանքների ավարտին հայտարարի՝ Ապրիլյան պատերազմը պայմանավորված չէր, ի՞նչ կստացվի։
– Կստացվի, որ պարոն Փաշինյանը հերթական մանիպուլյատիվ հայտարարությունն էր անում, ինչպես նա սիրում է անել։ Ընդդիմադիր պարոն Փաշինյանի և վարչապետ պարոն Փաշինյանի հայտարարությունները շատ հաճախ իրար չեն համապատասխանում, և ես զարմանում եմ, որ զարմանում եք դրանից։
– Ընդդիմադիր պատգամավոր Փաշինյանի տված այլ հայտարարություններն ու խոստումները վարչապետ Փաշինյանի պարագայում իրականություն չե՞ն դառնում։
– Այո՛, չեն դառնում, և դա այն թիրախներից մեկն է, որին մենք անընդհատ խփում ենք. չի կարելի այդպես շարունակել։ Սկսած կառավարության կառուցվածքը փոխելուց՝ վերջացրած անցումային արդարադատություն անելը, իրականություն չդարձավ։ Հեղափոխությունը քաղաքացիների մոտ ստեղծել է բարձր սպասումներ, որ հիմա ամեն ինչ փոխվելու է, և այդ սպասումները եղել են այդ խոստումներով՝ կարմիր գծերի, արագաչափերի վերացում, սուպերվարչապետական համակարգից հրաժարում։ Բայց եթե այդ ամենը չի արվում, դա քաղաքացիների մոտ առաջացնում է հիասթափություն։
Հարցազրույցի մանրամասները՝ տեսանյութում
ԱՂԱՎՆԻ ՍՈՒՔԻԱՍՅԱՆ
