Կպատժի՞ «Յուվենթուսը» Ռոնալդուին «Միլանի» հետ խաղում պահվածքի համար
«Յուվենթուսի» հարձակվող Կրիշտիանու Ռոնալդուն չի պատժվի իր պահվածքի համար Իտալիայի առաջնության 12-րդ տուրի «Միլանի» հետ խաղից հետո (1:0):
55-րդ րոպեին թուրինյան ակումբի գլխավոր մարզիչ Մաուրիսիո Սարրին փոխարինեց պորտուգալացուն, ով անմիջապես գնաց հանդերձարան, այնուհետև հեռացավ մարզադաշտից՝ առանց սպասելու հանդիպման ավարտին:
Ակումբի ներքին կանոնների համաձայն՝ Ռոնալդուին պետք է տուգանեին մեծ գումարով, բայց «Յուվենթուսի» ղեկավարությունը չի կիրառել պատժամիջոցներ խաղացողի նկատմամբ, հայտնում է Goal.com-ը՝ վկայակոչելով La Stampa-ի տպագիր տարբերակը:
Ավելի վաղ Սարրին հայտարարել էր, որ Ռոնալդուն ծնկի ցավ ունի: Նշենք, որ Կրիշտիանուն փոխարինվեց երկրորդ խաղում անընդմեջ:
Սիրարփի Աղաբաբյան
