Մեկնարկել է Ռոբերտ Քոչարյանի և մյուսների գործով դատական նիստը. ՈՒՂԻՂ
Երևանի ընդհանուր իրավասության դատարանում, դատավոր Աննա Դանիբեկյանի նախագահությամբ, ժամը 13:00-ին մեկնարկել է Ռոբերտ Քոչարյանի և մյուսների գործով դատական նիստը:
Հիշեցնենք, որ նախորդ դատական նիստը դատավոր Աննա Դանիբեկյանը հետաձգել էր՝ հաշվի առնելով, որ Ռոբերտ Քոչարյանի բացակայությամբ դատարանը հայտարարություններ չէր լսելու, հետևաբար՝ գործի քննությունը չէր կարող շարունակվել:
Նախորդ դատական նիստին Քոչարյանը ներկա չէր, քանի որ հոկտեմբերի 9-ին վիրահատվել էր և գտնվում էր հետվիրահատական փուլում:
Հիշեցնենք, որ Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:
Գործով անցնող մյուս մեղադրյալներն են Պաշտպանության նախկին նախարար Սեյրան Օհանյանը, ՀԱՊԿ նախկին գլխավոր քարտուղար Յուրի Խաչատուրովը, Ազգային անվտանգության խորհրդի նախկին քարտուղար Արմեն Գևորգյանը:
ԱՔՍԱՆՆԱ ՀԱՅՐԱՊԵՏՅԱՆ
