Մերկելը կայցելի Վարշավա՝ մասնակցելու Երկրորդ աշխարհամարտի սկսվելու տարելիցի արարողությանը
Գերմանիայի կանցլեր Անգելա Մերկելը կայցելի Վարշավա եւ այնտեղ կմասնակցի Երկրորդ համաշխարհային պատերազմի սկսվելու 80-րդ տարելիցին նվիրված արարողությանը: Այդ մասին ԳԴՀ-ի նախարարների կաբինետի պաշտոնական ներկայացուցիչ Շտեֆան Զայբերտը հայտնել է օգոստոսի 30-ին Բեռլինում կայացած ճեպազրույցում:
«Կանցլերը կուղեւորվի Վարշավա, որպեսզի այնտեղ մասնակցի հիշատակի գլխավոր արարողությանը»,-ասել է նա: Զայբերտի խոսքով՝ վերմախտի ներխուժումը Լեհաստան «սկիզբ դրեց այն հանցագործություններին», որոնք նացիոնալ-սոցիալիստները կատարեցին Երկրորդ համաշխարհային պատերազմի ժամանակ: Միաժամանակ նա կրկին նշել է, որ, ԳԴՀ-ի կառավարության տեսակետով, Երկրորդ համաշխարհային պատերազմի ժամանակ պատճառված վնասի համար Լեհաստանին ռազմատուգանքներ վճարելու հարցը «փակված է իրավաբանական ու քաղաքական տեսակետից»:
Միջոցառմանը մասնակցելու համար Վարշավա կուղեւորվի նաեւ Գերմանիայի նախագահ Ֆրանկ-Վալտեր Շտայնմայերը, հաղորդել է ՏԱՍՍ-ը:
