«Որոշ խմբերի կողմից ավանդույթների պաշտպանության շղարշի տակ մանիպուլյացիաները կոնվենցիայի հետ կապված առնվազն ազնիվ չեն»
«Կանանց նկատմամբ բռնության և ընտանեկան բռնության կանխարգելման և դրանց դեմ պայքարի մասին» (Ստամբուլյան) կոնվենցիայի վավերացմամբ մարդու իրավունքների պաշտպանության, հատկապես բռնությունից ազատ հասարակություն կառուցելու հարցում Հայաստանի Հանրապետությունը հնարավորություն կունենա օգտվելու կոնվենցիայով նախատեսված փորձագիտական աջակցության մեխանիզմներից: Ֆեյսբուքյան ուղիղ եթերի ժամանակ այս մասին ասաց ՀՀ արդարադատության նախարարի տեղակալ Քրիստիննե Գրիգորյանը, նշելով, որ դա հնարավորություն կտա ՀՀ քաղաքացիների օգտվել իրենց իրավունքներից Եվրոպայի տարածքի բոլոր երկրներում:
«Ի վերջո, սա երկրի միջազգային հեղինակության հարցն է` բռնությունից ազատ հասարակությունը կառուցելու հարցում»,-ասաց Գրիգորյանը:
Նրա խոսքով` որոշ խմբերի կողմից ավանդույթների պաշտպանության շղարշի տակ մանիպուլյացիաները կոնվենցիայի հետ կապված առնվազն ազնիվ չեն` հայոց պատմության և իրական ավանդույթների նկատմամբ:
«Դեռևս 12-րդ դարի հայ իրավաբանները ընտանիքում բռնությունների համար սահմանել են շատ ավելի խիստ պատիժներ, քան բռնությունների այլ տեսակների համար: 12-րդ դարում ոչ կար Եվրոպայի խորհուրդը, ոչ էլ Եվրամիությունը, սակայն հայ հասարակության ավանդույթների վերաբերյալ գնահատականը հստակ է եղել»,- ընդգծեց Գրիգորյանը:
