ՀՅԴ ԳՄ ներկայացուցիչները և «Ազգային օրակարգ» կուսակցության անդամները քննարկել են Հայաստանի ներկայիս իրավիճակը
ՀՅ Դաշնակցության Գերագույն մարմինը շարունակում է խորհրդարանական և արտախորհրդարանական ուժերի հետ քաղաքական հանդիպումների շարքը՝ քննարկելու համար երկրի արտաքին և ներքին քաղաքական զարգացումներին առնչվող հարցեր։
Այսօր` հուլիսի 19-ին, ՀՅԴ Հայաստանի Գերագույն մարմնում տեղի ունեցավ հանդիպում «Ազգային օրակարգ» կուսակցության խորհրդի անդամներ Արա Հակոբյանի, Աշոտ Ղազարյանի, Նորայր Աղայանի և Արա Գասպարյանի հետ:
Դաշնակցության կողմից հանդիպմանը մասնակցում էին ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը, ՀՅԴ մասնագիտական ոլորտային հանձնախմբերի համակարգող Արծվիկ Մինասյանը, ՀՅԴ Գերագույն մարմնի անդամներ Լիլիթ Գալստյանը և Արթուր Խաչատրյանը։
Քննարկվեց երկրի ներքաղաքական իրավիճակին առնչվող հարցերի լայն շրջանակ: Կողմերը, կարևորելով դատա-իրավական համակարգում բարեփոխումների անհրաժեշտությունը, միաժամանակ իրենց մտահոգությունները հայտեցին դատական համակարգի շուրջ ընթացող գործընթացների վերաբերյալ: Երկրի ներքին ու արտաքին` առկա մարտահրավերների համատեքստում կարևորվեց համագործակցության հնարավորությունն ու անհրաժեշտությունը: Ձեռք բերվեց քաղաքական համագործակցությունն ու խորհրդակցությունները շարունակելու և արդյունավորելու պայմանավորվածություն:
