Ինչպե՞ս է ստացվել, որ 2019թ շինարարությունն աճել է, իսկ  բետոնի, շինարարական քարատեսակների արտադրությունը՝ նվազել

Տնտեսագետներից ոմանք որոշակի վիճակագրական տվյալների հիման վրա տարակուսանք են հայտնում, թե ինչպե՞ս է ստացվել, որ 2019թ հունվար-մայիսին շինարարությունն աճել է՝ 6.1%, միաժամանակ՝ 7.7% նվազել է բետոնի, 8% նվազել է՝ շինարարական քարատեսակների, 12% նվազել է շենքերի ու կառույցների համար ցեմենտ-բետոնից հավաքովի պատրաստի կոնստրուկցիաների արտադրությունը, և հարցադրում են անում՝ արդյո՞ք այստեղ վիճակագրական «նկարչության» հետ գործ չունենք:

168.am-ը պարզաբանում խնդրեց ԱԺ «Իմ քայլը» խմբակցության պատգամավոր, Ֆինանսավարկային և բյուջետային հարցերի մշտական հանձնաժողովի փոխնախագահ Արտակ Մանուկյանից։

«Նախ պետք է նշեմ, որ ամենայն հավանականությամբ այդ դիտարկումը հիմնված է ՎԿ-ի հետևյալ հրապարակման էջ 24-ում ներկայացված տվյալների հիման վրա, որը մեթոդաբանորեն կոռեկտ չէ մի քանի պատճառներով՝ այստեղ ներկայացված է միայն արտադրությունը, և չկան տվյալներ ներմուծման մասով, օրինակ՝ շենքերի ու կառույցների համար ցեմենտ-բետոնից հավաքովի պատրաստի կոնստրուկցիաների արտադրությունը, և երկրորդ՝ կա ժամանակային լագ, այսինքն՝ տվյալ ժամանակահատվածում արտադրվածը, պարտադիր չէ, որ հենց նույն ժամանակահատվածում մասնակցի շինարարության գործընթացին։ Ըստ այդմ՝ այդ դիտարկումները մեթոդաբանական տեսանկյունից խոցելի են»,- ասաց Ա.Մանուկյանը։

Ըստ նրա՝ դիտարկումն ավելի ամրապնդված կլիներ, եթե իրականացվեր խորքային վերլուծությունների հիման վրա. «Այդ տնտեսագետներին հորդորում եմ դիմել համապատասխան մարմիններին՝ վիճակագրական տեսանկյունից ավելի որակյալ վերլուծություն իրականացնելու համար»։