Վրաստանի նախագահի նստավայրը կկահավորեն հին կահույքով
Վրաստանի նախագահի վարչակազմի շենքի պատմական մասի վերանորոգումն ավարտված է. Թբիլիսիում Օրբելիանիների իշխանական պալատը կկահավորեն հնամենի կահույքով՝ նպատակ ունենալով վերստեղծելու այն ժամանակվա դարաշրջանը: Այդ մասին հայտարարել է նախագահի մամուլի քարտուղար Խատիա Մոիսցրապիշվիլին:
«Շուտով Օրբելիանիների նախկին պալատը կհանդերձվի գույքով, որը Վրաստանում մինչ այդ օգտագործել են բնակելի նստավայրերի կահավորման համար: Մենք այդպիսի կահույք գտանք տեղական ընտանիքներում, մի մասն էլ ընտրել ենք արտասահմանում: Հարկ է նշել նաեւ այն, որ երկրորդային կահույքի ձեռքբերումը մեզ համար ավելի արդարացված էր նաեւ ֆինանսական առումով»,- ասել է Մոիսցրապիշվիլին ճեպազրույցում:
Հենց որ Օրբելիանիների պալատը վերականգնի իր պատմական տեսքը, այնեղ թանգարանային տարածք կբացվի: Արվեստի ոլորտի խրախուսման եւ աջակցման նպատակով պալատում նաեւ կկազմակերպվեն ցուցահանդեսներ, հաղորդել է Sputnik-ը:
