Ի՞նչն է կապում Տիգրան Ավինյանին և Աղվան Հովսեփյանին, և ինչո՞ւ Արցախի որևէ պաշտոնյա չմասնակցեց ՀՀ-ում տոնակատարություններին՝ ըստ Լիլիթ Մակունցի
«Իմ քայլը» խմբակցության ղեկավար Լիլիթ Մակունցն այսօր ԱԺ-ում լրագրողների հետ զրույցում հրաժարվեց մեկնաբանել նախօրեին Ապարանում ՀՀ փոխվարչապետ Տիգրան Ավինյանի և նախկին գլխավոր դատախազ Աղվան Հովսեփյանի ջերմ հարաբերությունների դրսևորումը։
«Չեմ տիրապետում իրավիճակին, չգիտեմ՝ ինչ հանգամանքներում ինչ է եղել»,- ասաց Լ.Մակունցը՝ խորհուրդ տալով դիմել փոխվարչապետի գրասենյակ։
Նա նշեց, թե ինքը չի դիմել, քանի որ այլ գործերով է զբաղված եղել։
Մակունցը հորդորեց նաև լրագրողներին՝ չորրորդ իշխանության ներկայացուցիչներին, որը, ըստ նրա, ոչ պակաս հզոր իշխանություն է, պարզաբանում ստանալ։
Հարցին՝ Ձեզ համար տարօրինակ չէ՞ր, որ Արցախի որևէ պաշտոնյա ՀՀ-ում տոնակատարություններին մասնակցություն չունեցավ, արդյո՞ք դա վերջին լարվածություններով էր պայմանավորված, Մակունցը պատասխանեց.
«Լարվածությունների հետ չեմ կապի։ Իհարկե, ընդունելի չեմ համարում։ Թե ի՞նչն է պատճառը, ես կարծում եմ, որ պետական արարողակարգը պետք է պարզաբանում ներկայացնի այս առնչությամբ և տեղեկացնի, թե ինչ է տեղի ունեցել»։
