Արարատի մարզպետի հովանավորյալ դոկտորը՝ Դատախազության թիրախում

Արարատի մարզպետ Գարիկ Սարգսյանի հովանավորյալ պաշտոնյաներից մեկի գործունեության վերաբերյալ Դատախազությունում նյութեր են նախապատրաստվում: Դատախազության թիրախում հայտնված անձը «Արտաշատի»  բժշկական կենտրոնի (ԲԿ) նորանշանակ ղեկավար Հայկ Համբարձումյանն է, ում թևերով քայլարշավի օրերին ու դրանից հետո Գարիկ Սարգսյանը մշտապես կարողացել է հեղափոխական միջոցառումների համար պահանջված մասովկան ապահովել:

Առիթը՝ ԲԿ ղեկավարի գործունեության դրվագներից մեկի մասով կոռուպցիոն ռիսկ պարունակող գործարքն է եղել: Ընդամենը մեկ ամիս առաջ  այս պաշտոնում հաստատված Հայկ Համբարձումյանը, պարզվում է, ինքնուրույնաբար,  օրենքի կոպիտ խախտումներով փորձել է պետական գույքի հաշվին եկամուտներ ստանալ: Խոսքը   «Արտաշատի» ԲԿ-ի գլխավոր մասնաշենքում բացված բուժզննման կետի մասին է։ Հայկ Համբարձումյանն իր գլխավորած ԲԿ-ի առաջին հարկը զավթել է մարտ ամսից, բոլորովին նոր ձեռք բերված՝  2019թ. արտադրության «Սիմենս»  ապրանքանիշի համակարգչային տոմոգրաֆիայի սարք է տեղադրել,  և որպես լրացուցիչ եկամտի աղբյուր՝ կողքից գումար է աշխատում:

Մարզպետի «լյուբիմչիկ» դոկտորի նորաստեղծ բիզնեսից  հարկվող մասը, որոշ պնդումների համաձայն, հաճախ չի երևում կամ թաքցվում է անուղղակի ձևով, միայն այն պատճառով, որ մարզի բնակչությունն իրականում գլխի չի ընկել, որ պետական հիվանդանոցի շենքում գլխավոր բժիշկն  իրականում իր անձնական բիզնեսն է ծաղկեցնում:

Նշենք, որ պետական հիվանդանոցի այս տարածքը, ըստ 168.am-ին փոխանցված տեղեկության, օգտագործվում է առանց թուղթ-թանաքի: Մարզպետի հովանավորյալն իր դիրքերն այնքան է ամրացրել, որ Նոր Հայաստանում ավելորդ է համարել պաշտոնական դիրքը չարաշահելիս՝ թեկուզ ձևի համար պետության հետ վարձակալության մի պայմանագիր կնքել:

Ավելին, հեղափոխությունից հետո նախկինների աշխատանքն անընդհատ  փնովող, հանուն պետության ու հիվանդի  արդարություն հորջորջող  ԲԿ ղեկավարը, բացի այն, որ տոմոգրաֆիայի սարքի ապօրինի տեղադրումով պետական տարածքն է առանց վարձավճարի շահագործում, նաև իր անձնական բիզնեսի կոմունալ վարձերն է գցել պետության ուսերին:

Սյուզի Բադոյան