Նիկոլ Փաշինյանը բարձր է գնահատում ՄԱԿ-ի կառույցների հետ իրականացվող ծրագերը
ՀՀ վարչապետ Նիկոլ Փաշինյանն ընդունել է ՄԱԿ-ի հայաստանյան կազմակերպությունների ղեկավարներին՝ ՄԱԿ-ի մշտական համակարգող Շոմբի Շարփի գլխավորությամբ:
Վարչապետը կարևորել է ՀՀ կառավարության և ՄԱԿ-ի կառույցների միջև տարբեր ուղղություններով համագործակցությունը և բարձր գնահատել մեր երկրում համատեղ իրականացվող ծրագրերը: Նիկոլ Փաշինյանն ընդգծել է, որ ՀՀ կառավարությունը նախաձեռնել է հավակնոտ բարեփոխումների օրակարգ և անհրաժեշտ է վերջինիս ու ՄԱԿ-ի կառույցների ծրագրերի համադրումը՝ առաջիկայում նախատեսվող միջոցառումներն առավել արդյունավետ կյանքի կոչելու նպատակով:
Շոմբի Շարփը ողջունել է ՀՀ կառավարության նախաձեռնողական քաղաքականությունը՝ հավելելով, որ ՄԱԿ-ն իր կառույցներով պատրաստ է շարունակել սերտորեն համագործակցել հայ գործընկերների հետ՝ նախատեսվող միջոցառումներն ու բարեփոխումներն առաջ մղելու նպատակով:
ՄԱԿ-ի զարգացման ծրագրի, ՄԱԿ-ի մանկական հիմնադրամի, ՄԱԿ-ի փախստականների հարցերով գերագույն հանձնակատարի գրասենյակի, ՄԱԿ-ի բնակչության հիմնադրամի, ՄԱԿ-ի արդյունաբերության զարգացման կազմակերպության, Պարենի ու գյուղատնտեսության կազմակերպության ներկայացուցիչները, Միգրացիայի միջազգային կազմակերպության գրասենյակի ղեկավարը, Առողջապահության համաշխարհային կազմակերպության գործադիր ղեկավարը, ՄԱԿ-ի գլոբալ հաղորդակցության վարչության գրասենյակի ղեկավարը, Աշխատանքի միջազգային կազմակերպության ազգային համակարգողը, ՄԱԿ-ի մշտական համակարգողի գրասենյակի համագործակցության գծով խորհրդական և ՄԱԿ-ի խաղաղության և զարգացման գծով խորհրդականը վարչապետին մանրամասներ են ներկայացրել իրենց գործունեության, ՀՀ կառավարության տարբեր մարմինների հետ փոխգործակցության վերաբերյալ:
Այնուհետև զրուցակիցները քննարկել են պետական կառավարման համակարգի արդիականացման, գյուղատնտեսության, արդյունաբերության, առողջապահության, զբոսաշրջության, ենթակառուցվածքների, տարածքային համաչափ զարգացման և այլ ոլորտներում համագործակցությանը վերաբերող հարցեր:
