Ասանժի գործով հաջորդ լսումները կկայանան մայիսի 30-ին
Wikileaks կազմակերպության հիմնադիր Ջուլիան Ասանժի արտահանձնման գործով հաջորդ լսումները կկայանան մայիսի 30-ին: Այդ մասին ՏԱՍՍ-ի թղթակիցը հայտնել է Վեսթմինսթերյան մագիստրատական դատարանի դահլիճից:
Նիստը նախագահող դատավոր Մայքլ Սնոուն նաեւ որոշել է, որ Ասանժի գործով ընդլայնված լսումները կկայանան հունիսի 12-ին:
Wikileaks-ի հիմնադիրն ինքը տեսակապով հայտարարել է, որ չի ցանկանում արտահանձնված լինել ԱՄՆ: Ավելի վաղ Ավստրալիայի արտաքին գործերի եւ առեւտրի նախարարության պաշտոնական ներկայացուցիչը հայտարարել է, որ Ավստրալիայի կառավարությունը շարունակում է հյուպատոսական աջակցություն ցուցաբերել Wikileaks-ի հիմնադրին՝ ավստրալացի Ջուլիան Ասանժին, որը մայիսի 1-ին բրիտանական դատարանի կողմից 50 շաբաթվա բանտային կալանքի է դատապարտվել 2012 թվականին գրավով ազատ արձակվելու պայմանները խախտելու համար:
«Ավստրալիայի կառավարությունը շարունակում է հյուպատոսական աջակցություն ցուցաբերել պարոն Ասանժին, որը ներառում է բանտում նրան այցելելը եւ շփումը ավստրալացի նրա մերձավորների հետ»,-ասել է Ավստրալիայի ԱԳ նախարարության ներկայացուցիչը:
