«Սրբազանը ներկայացրել է, որ մենք ազգականներ ենք». Արգիշտի Քյարամյան
«Եթե ես չեմ սխալվում, սրբազանը լրագրողների հարցին ի պատասխան՝ ներկայացրել է, որ մենք ազգականներ ենք: Ես հիշում եմ, որ լրագրողներից մեկն ինձ զանգահարեց և այդ հարցը տվեց, ես պատասխանեցի, որ չեմ ցանկանում մեկնաբանել, չնայած որ կարող եմ հեշտությամբ հերքել: Եվ շեշտ դրեցի այն հանգամանքի վրա, որ յուրաքանչյուր անձ, այդ թվում՝ պաշտոնական անձ, քաղաքացի, ոչ քաղաքացի, դատապարտյալ, ռազմագերի, ցանկացած անձ ունի անօտարելի իրավունքներ, այդ թվում՝ ընտանեկան կյանքի գաղտնիության իրավունք»,- այսօր կառավարությունում լրագրողների հետ զրույցում հայտարարեց Պետական վերահսկողական ծառայության պետի ժամանակավոր պաշտոնակատար Արգիշտի Քյարամյանը՝ պատասխանելով հարցին, թե ո՞վ է իր հայրը:
Ըստ շրջանառվող լուրերի՝ Արգիշտի Քյարամյանի հայրը Կոտայքի թեմի առաջնորդ Առաքել եպիսկոպոսն է (անձնագրային անունը՝ Էլբեկ Քյարամյան), սակայն Սրբազանը հերքել էր այդ լուրերը` տեղեկացնելով, որ Արգիշտին իր հորեղբոր թոռն է:
