Արցախում գրանցվել է վերին շնչուղիների հիվանդության թեթևակի աճ
Նախորդ տարվա նույն ժամանակահատվածի համեմատ վերին շնչառական ուղիների սուր վարակների և գրիպի առումով ԱՀ-ում հիվանդության թեթևակի աճ է գրանցվել, հայտնում են Արցախի Հանրապետության առողջապահության նախարարությունից:
«Այսօրվա դրությամբ հանրապետության բուժհաստատություններում բուժում են ստանում 60 հիվանդ, որից 41-ը երեխաներ են:
Հիվանդներից 24 մոտ հայտնաբերվել է թոքաբորբ, նրանցից 10-ը երեխաներ են:
Հանրապետությունում շարունակվում է վերին սուր շնչառական վարակների նկատմամբ ամենօրյա մշտադիտարկումը:
Վերին շնչառական հիվանդությունների ուղիների սուր վարակների պատճառով հանրապետության դպրոցներում բացակաների թիվը 10 % է, իսկ նախադպրոցական հաստատություններում՝ 18 %:
ԱՀ առողջապահության նախարարությունը կրկին հորդորում և հիշեցնում է.
գրիպանման երևույթների առկայության դեպքում մնալ տանը, չհաճախել աշխատանքի, դպրոց, մանկապարտեզ, բարձրագույն ուսումնական հաստատություններ,
չմասնակցել զանգվածային միջոցառումներին, որը կարող է պատճառ դառնալ հիվանդի վիճակի վատացման և նոր դեպքերի առաջացման ու տարածման,
չշփվել գրիպանման երևույթներով անձանց հետ,
եթե շրջապատում առկա է գրիպով հիվանդ, պահպանել 2 մ հեռավորություն,
չզբաղվել ինքնաբուժմամբ, անհարկի չօգտագործել հակաբիոտիկներ` կազմակերպելով բժշկի այցը տուն,
պահպանել հազալու և փռշտալու վարվելակարգը,
խստորեն հետևել անձնական հիգիենային,
հագնվել եղանակին համահունչ,
հաճախակի օդափոխել փակ տարածքները»:
