«Եթե կրկին չգոհացնի պատասխանը, ոչ միայն երկաթգիծն ենք փակելու, այլև միջպետական ճանապարհը». Պղնձամոլիբդենայինի աշխատակիցները երկաթգիծը ժամանակավոր բացեցին

Ալավերդու պղնձաձուլական գործարանի աշխատակիցները վաղ առավոտից փակել էին Երևան-Թբիլիսի երկաթգիծը:

Աշխատակիցների փոխանցմամբ՝ իրենց նամակ-ահազանգին որևէ արձագանք չկա, հետևաբար՝ բողոքի ակցիա են իրականացնում:

Հիշեցնենք, որ Ալավերդու պղնձաձուլական գործարանի աշխատակիցները փետրվարի 8-ին նամակ էին գրել ՀՀ վարչապետ Նիկոլ Փաշինյանին: Զուգահեռ կազմակերպել էին ստորագրահավաք, որը նամակին կից ուղարկվել էր կառավարություն:

20:30-ին նրանք դադարեցրին բողոքի ակցիան՝ սպասելով ուրբաթ օրը կառավարության ու գործարանի ներկայացուցիչների հետ հանդիպմանը: 

«Գալու են կառավարությունից, կարծես թե փոխվարչապետը: Ներկա են լինելու նաև սեփականատերն ու բանկի ներկայացուցիչները, բայց, եթե էլի չգոհացնի պատասխանը, արդեն ոչ միայն երկաթգիծն ենք փակելու, այլ նաև միջպետական ճանապարհը»,- 168.am-ի հետ զրույցում ասացին Ալավերդու պղնձնաձուլական գործարանի աշխատակիցները:

Նշենք, որ ավելի վաղ Լոռու մարզպետ Անդրեյ Ղուկասյանը 168.am-ին հայտնել էր, որ բողոքի ակցիայի մասնակիցներին առաջարկել են ուրբաթ օրը հանդիպել կառավարության և պղնձաձուլական գործարանի ներկայացուցիչների հետ: 

Հավելենք, որ այսօր Ազգային ժողովում Կառավարության ծրագրի քննարկման ժամանակ վարչապետին Ալավերդու պղնձաձուլական գործարանի և «Թեղուտի» վերաբերյալ հարց ուղղեց «Լուսավոր Հայաստան» խմբակցության պատգամավոր Արմեն Եղիազարյանը։

Նիկոլ Փաշինյանը նշեց, որ «ՎՏԲ-Հայաստան» բանկը 380 միլիոն դոլարի վարկ է տրամադրել «Վալեքս» ընկերությանը, հետո վարկը մարել չի հաջողվել:

«Անվճարունակության խնդիր կա: Մայիսից ներգրավվել ենք գործընթացի մեջ, փորձել ենք օգնել, որ բանկն ու ընկերությունը համաձայնության գան: Այնտեղ շատ խառը գրավների և պարտավորությունների համակարգ կա: Անցած տարի մենք հասանք համաձայնության, որ ՎՏԲ բանկը պետք է դառնա սեփականատեր, ներգրավի պղնձի ոլորտում հայտնի օպերատոր, որը «Թեղուտի» հանքը կաշխատացնի, ու այս համատեքստում կաշխատի նաև պղնձաձուլարանը: Այս ընթացքում մի շատ տարօրինակ պատմություն տեղի ունեցավ: Ինչ-որ մի ընկերություն 4000 դոլար պարտքի համար դիմեց դատարան և պահանջեց, որ բոլոր պրոցեսների վրա դրվի կալանք: Դատարանը կալանք սահմանեց մի քանի հարյուր միլիոն դոլարանոց ընկերության, գույքի, շարժի, իրավական պրոցեսների վրա: Դատական այս որոշման պատճառով նախկին պայմանավորվածությունների համակարգը կամաց-կամաց սկսեց քանդվել:

Բանակցությունները վերադարձել են զրոյական կետի, որովհետև օպերատորը, որը ներգրավված էր, այս պատմություններից հետո չցանկացավ մտնել գործընթացի մեջ»,- ասել է Նիկոլ Փաշինյանը:

Վարչապետը նշել է նաև, որ «Վալեքս» ընկերության և «ՎՏԲ-Հայաստան» բանկի միջև բանավեճը նոր հարթություն է տեղափոխվել, և կառավարությունը պետք է օգնի, որ բանակցություններն արդյունավետ լինեն։

Անի Կարապետյան