Վրաստանի վարչապետը վերջին հայտարարությունն է արել ընտրություններից առաջ
Վրաստանի վարչապետ Մամուկա Բախտաձեն բոլոր գործատուներին կոչ է արել ստեղծել բոլոր պայմանները, որպեսզի քաղաքացիները կարողանան անարգել մասնակցել նախագահական ընտրությունների երկրորդ փուլին։ Վրաստանի քաղաքացիները պետության հինգերորդ ղեկավարին կընտրեն նոյեմբերի 28-ին:
Այդ օրը ոչ աշխատանքային օր է հայտարարված ամբողջ երկրում: Նախագահական աթոռի համար կպայքարեն միացյալ ընդդիմության թեկնածու Գրիգոլ Վաշաձեն եւ Սալոմե Զուրաբիշվիլին, որին պաշտպանում են գործող իշխանությունները:
«Բոլոր գործատուներին կոչ եմ անում նպաստել այն բանին, որ մեր բոլոր քաղաքացիները հնարավորություն ունենան մասնակցելու ընտրություններին, եւ չսահմանափակվեն օրենքով նրանց երաշխավորված իրավունքները»,- ճեպազրույցում հայտարարել է Բախտաձեն: Կառավարության ղեկավարը բոլոր քաղաքացիներին կոչ է արել դրսերորել ակտիվություն եւ կատարել երկրի հանդեպ իրենց քաղաքացիական պարտքը, հաղորդել է Sputnik-ը:
