«Սասուն Միքայելյանի ասածն իրականում քաղաքական ծրագիր է, որն իրականացնում է Նիկոլ Փաշինյանը». Դավիթ Շահնազարյան

«Փաշինյանին երեկ ոչ թե Սասուն Միքայելյանի հայտարարությունն էր զայրացրել, չնայած՝ երևի դա էլ էր զայրացրել, որովհետև արձագանքն իր սպասածից ավելի մեծ էր և ավելի կոշտ, այլ հիմնականում նրան ուղղակի անսպասելիորեն զայրացրել էր երեկվա ՀՀԿ-ի միջոցառումը, որին ավելի շատ մարդ էր մասնակցում, քան իրենց միջոցառմանը»,- այսօր լրագրողների հետ հանդիպմանն այս մասին ասաց ՀՀԿ ցուցակի երրորդ համար Դավիթ Շահնազարյանը։

Ինչ վերաբերում է Սասուն Միքայելյանի հայտարարությանը, Շահնազարյանն ասաց, որ Արցախի հարցով ավելի ուշ ասուլիսի կհրավիրի և կներկայացնի, որ այն, ինչ ասել է Սասուն Միքայելյանը, իրականում քաղաքական ծրագիր է, որը, ըստ նրա՝ իրականացնում է Նիկոլ Փաշինյանը. «Այսինքն՝ իշխանություն՝ Արցախի փոխարեն։ Ես խոստանում եմ, որ բոլորդ դրանում կհամոզվեք։ Սասուն Միքայելյանն ուղղակի արտահայտել է այն, ինչը ներկայիս իշխանությունների քաղաքական նպատակն է»։

Հիշեցնենք, որ երեկ Թալինում տեղի ունեցած «Իմ քայլը» դաշինքի հանրահավաքի ժամանակ Սասուն Միքայելյանը հայտարարել էր. «Մենք հաղթել ենք Արցախյան պատերազմում։ Ես չեմ վարանում, չեմ վախենում ասել՝ այս հաղթանակը, որ մեր հանրապետությունում կրեցիք դուք՝ հայ ժողովուրդը, ավելի կարևոր էր, քան Արցախյան ազատամարտը»։

Մանրամասները՝ 168.am-ի տեսանյութում