Թուրքիային անհանգստացրել է Սիրիայի սահմանին դիտակետեր հիմնելու ԱՄՆ-ի մտադրությունը
Թուրքիան բնավ չի ողջունում թուրք-սիրիական սահմանին դիտակերեր տեղակայելու ԱՄՆ-ի մտադրությունը։ Այս մասին, ըստ ermenihaber.am-ի՝ հայտարարել է Թուրքիայի պաշտպանության նախարար Հուլուսի Աքարը։
Նոյեմբերի 21-ին Պենտագոնի ղեկավար Ջիմ Մեթթիսը հայտարարել էր, որ Վաշինգտոնը մտադիր է մի քանի դիտակետեր հիմնել թուրք-սիրիական սահմանին՝ անվտանգության նկատառումներից ելնելով։ Դրանց հիմնումը նպատակ ունի նվազեցնել Թուրքիայի զինուժի և Սիրիայի քրդական ուժերի հաճախադեպ բախումները։ Ինչպես հայտնի է, պաշտոնական Անկարան Սիրիայի քուրդ զինյալներին համարում է ահաբեկիչներ, իսկ Վաշինգտոնը՝ ոչ։
Կանադայում տեղի ունեցած «Halifax» համաշխարհային անվտանգության գագաթաժողովի շրջանակներում թուրքական կողմն ամերիկացի պաշտոնյաների հետ հանդիպումների ժամանակ դժգոհություն է հայտնել և դեմ արտահայտվել այդ մտադրությանը։
Ըստ Թուրքիայի պաշտպանության նախարարի՝ այդ դիտակետերի ստեղծումն ավելի կբարդացնի առանց այդ էլ լարված իրավիճակը։
