«Մենք չենք ուզում արտագաղթել». Ալավերդու պղնձաձուլական գործարանի աշխատողները կրկին հանդիպելու են Սիսեռյանին
Այսօր Ալավերդու պղնձաձուլական գործարանի աշխատակիցները հերթական անգամ հանդիպելու են փոխվարչապետի պաշտոնակատար Տիգրան Ավինյանի գրասենյակի ղեկավար Վարագ Սիսեռյանին ու վարչապետի պաշտոնակատարի օգնական Արեն Մկրտչյանին։
Գործարանի աշխատակիցները 168.am-ի հետ զրույցում հայտեցին, որ հանդիպումը տեղի կունենա այսօր, իրենց պահանջն էլ անփոփոխ է: Պետք է աշխատեն, հակառակ դեպքում շատ ընտանիքներ սովի են մատվելու կամ արտագաղթելու են:
«Մենք չենք ուզում արտագաղթել, ուզում ենք աշխատել ու արարել»,- նշեցին նրանք:
Ինչպես հայտնի է՝ հոկտեմբերի 23-ին Ալավերդու պղնձաձուլական գործարանի աշխատակիցներն աշխատանքից ազատվելու ծանուցումներ էին ստացել: Մեկ օր առաջ էլ կայացել էր ՀՀ փոխվարչապետի պաշտոնակատար Տիգրան Ավինյանի և «Վալլեքս» խմբի ընկերությունների նախագահ Վալերի Մեջլումյանի հանդիպումը:
Աշխատակիցների փոխանցմամբ՝ կառավարությունն իր քայլն արել է, բնապահպանական տույժը հանել է, մեկ տարվա աշխատելու թույլտվություն էլ տվել է:
Նշենք, որ Ալավերդու պղնձաձուլական գործարանի տնօրինությունը լուրջ ֆինանսական խնդիրների առջև է կանգնած: Հոկտեմբերի 19–ին ընկերությունը պաշտոնապես կասեցրել է իր գործունեությունը։
Անի Կարապետյան
