Էրդողանը սաուդացի լրագրողի սպանությունը կարող է ծառայեցնել Թուրքիայի շահերին
Թուրքիայի նախագահ Ռեջեփ Թայիփ Էրդողանը փորձում է իր երկրում սաուդացի հայտնի ընդդիմադիր լրագրող Ջամալ Հաշքաջիի վերաբերյալ զարգացող իրադարձությունները ծառայեցնել Թուրքիայի տնտեսական, քաղաքական շահերին: Այս մասին The Times պարբերականում գրել է թղթակից Ռիչարդ Սփենսերը:
Նա գրում է, որ Էրդողանը կարող է իրավիճակը օգտագործել Թուրքիայի, թե՛ տնտեսական, թե՛ քաղաքական շահերի տեսանկյունից:
«Հաշվի առնելով, որ լրագրողի սպանության հետ կապված Սաուդյան Արաբիան գտնվում է բավականին լուրջ խնդրի առաջ՝ Էրդողանը կարող է իրավիճակը շրջել և ծառայեցնել Թուրքիայի, թե՛ տնտեսական, թե՛ քաղաքական շահերին»,- գրել է թղթակիցը:
Սփենսերի կարծիքով՝ Էրդողանը կարող է Սաուդյան Արաբիայի առաջ պայման դնել, և լրագրողի սպանության հետ կապված մանրամասները չհրապարակելու դիմաց ստանալ տնտեսական կամ քաղաքական օգուտներ:
Հոդվածագիրը տեսակետ է հայտնել, որ Թուրքիայի իշխանություններն այս հանգամանքը կարող են օգտագործել նաև Քաթարի և Սաուդյան Արաբիայի միջև առկա հակամարտությունում:
«Թուրքիան կարող է նաև այս հանգամանքն օգտագործել Սաուդյան Արաբիայի դիրքերը իսլամական աշխարհում թուլացնելու նպատակով»,- մեկնաբանելով, որ Թուրքիան իրեն համարում է Օսմանյան կայսրության ժառանգորդն ու աշխարհի սունիների առաջնորդը՝ գրել է Սփենսերը:
Թուրքական ոստիկանությունը Ստամբուլում Սաուդյան Արաբիայի հյուպատոսություն մուտք գործելուց հետո անհետացած սաուդացի լրագրող Ջամալ Հաշքաջիի մարմնի մասունքները փնտրում է Ստամբուլին հարակից անտառում:
Թուրք քննիչները Սաուդյան Արաբիայի հյուպատոսությունում իրականացրած խուզարկության ժամանակ ձեռք են բերել տարբեր նմուշներ, որոնցով ստուգում են Հաշքաջիի ԴՆԹ հետքերի առկայությունը:
Ոստիկանության վարկածի համաձայն՝ հնարավոր է, որ լրագրողի մարմնի մասունքները թաքցված լինեն Ստամբուլին հարակից անտառում:
Մեկ այլ վարկածի համաձայն էլ՝ հնարավոր է, որ լրագրողի մարմնի մասունքները թաքցվել են Յալովա քաղաքի մոտակայքում:
