Ֆրանկոֆոնիայի շրջանակում կայացավ «Ժողովրդավարական և ընդգրկուն տեղական զարգացում» թեմայով կլոր սեղան
Երևանում անցկացվող Ֆրանկոֆոնիայի միջազգային օրերի շրջանակում տեղի ունեցավ «Ժողովրդավարական և ընդգրկուն տեղական զարգացում» թեմայով կլոր սեղանը:
Կլոր սեղանը կազմակերպվել էր ՀՀ տարածքային կառավարման և զարգացման նախարարության, Ֆրանսիայի գյուղական համայնքների ղեկավարների ասոցիացիայի և ՄԱԿ-ի Զարգացման ծրագրի կողմից:
ՀՀ-ում Ֆրանսիայի արտակարգ և լիազոր դեսպան Ժոնաթան Լաքոտը, դիմելով ներկաներին՝ նշեց, որ Ֆրանկոֆոնիայի գագաթնաժողովի շրջանակներում կազմակերպված համաժողովը շատ մեծ կարևորություն ունի:
«Նյու Յորքում տեղի ունեցած գագաթնաժողովը շատ բարձր մակարդակով անցկացվեց, ինչն էլ թույլ տվեց հայ և ֆրանսիացի մասնակիցներին մեկտեղել իրենց կարծիքները: ՀՀ առաջին փոխվարչապետ Արարատ Միրզոյանն այնտեղ ներկայացրեց նոր Հայաստանի դիրքորոշումն այսօրվա քննարկվող թեմայի վերաբերյալ: «Կայուն զարգացման» ծրագրի շրջանակներում, որը խրախուսում է միջազգային մակարդակում անցկացվող համագործակցությունը, Ֆրանսիայի տեղական ինքնակառավարման ներկայացուցիչները բազմաթիվ ծրագրերում իրենց ներգրավվածությունն ունեն: Ֆրանսիական մոտ 12 համայնք ներկայացվել են Հայաստանում, որպեսզի կարողանան ուրբանիզմի, զբոսաշրջության զարգացման և այլ խնդիրների շուրջ համագործակցել»,- ասաց Լաքոտը:
Դեսպանն ընդգծեց, որ Ֆրանսիայում ավելի է զարգանում քաղաքացիական մասնակցությունը՝ բյուջետային, ֆինանսական զարգացման խնդիրներում, ինչպես նաև տարբեր հանրաքվեների միջոցով:
«Ժողովրդավարությունը պետք է ավելի ներառական լինի և կանանց, և երիտասարդներին կարողանա ներգրավել տեղական ժողովրդավարության խնդիրներում»,- շեշտեց Ժոնաթան Լաքոտը:
ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը կարևորեց հանդիպումը, որի թեմատիկ ուղղվածությունը ժողովրդավարական և ընդգրկուն տեղական զարգացումն է:
«Մենք հատկապես այս ուղղությամբ շատ բան ունենք վերցնելու Ֆրանսիայից, որովհետև այս երկիրը՝ ժողովրդավարության մասնակցային, հրապարակային գործընթացների առումով, կարելի է համարել լավագույն փորձ ունեցողներից մեկը: Մենք ֆրանսիական տեղական ինքնակառավարման համակարգի հետ շփումների մեծ փորձ ունենք՝ արդեն 20 տարուց ավելի»,- ասաց Տերտերյանը:
Նա հույս հայտնեց, որ «Ժողովրդավարական և ընդգրկուն տեղական զարգացում» թեմայով կլոր սեղանը լավ առիթ կլինի մեկ անգամ ևս խոսելու այն ուղղությունների և մեսիջների մասին, որոնք ստացվում են միջազգային համագործակցության արդյունքում:
