Ռոբերտ Մյուլերն առաջարկել է ազատազրկել Դոնալդ Թրամփի շտաբի նախկին խորհրդականին
Միացյալ Նահանգների հատուկ դատախազ, վերջին նախագահական ընտրություններում Ռուսաստանի միջամտության գործը հետաքննող Ռոբերտ Մյուլերն առաջարկել է մինչև 6-ամսյա ազատազրկման դատապարտել նախագահ Դոնալդ Թրամփի նախընտրական շտաբի նախկին խորհրդական Ջորջ Պապադոպուլոսին:
Վերջինիս մեղադրանք էր ներկայացվել՝ նախաքննության ընթացքում դաշնային մարմիններին տված ցուցմունքներում ստելու համար: Պապադոպուլոսը, մասնավորապես, փորձել էր իրավապահ մարմիններից թաքցնել իր շփումները ենթադրաբար Ռուսաստանի շահերը ներկայացնող մի շարք անձանց հետ, որոնք նրան առաջարկել էին Թրամփի մրցակից Հիլարի Քլինթոնին վարկաբեկող տեղեկություններ փոխանցել:
Պապադոպուլոսն ընդունել էր մեղքը և համագործակցել քննության հետ: Նախագահ Թրամփի վարչակազմն ավելի վաղ հայտարարել էր, թե նախկին խորհրդականը նախընտրական շտաբում լուրջ պաշտոն չի զբաղեցրել:
