Սիրիայի օբյեկտները հրիթիռակոծելը սադրանք է, ագրեսիա տարածաշրջանի դեմ. Արաքս Փաշայան
Միացյալ Նահանգների, Մեծ Բրիտանիայի և Ֆրանսիայի կողմից Սիրիայի օբյեկտները հրիթիռակոծելը սադրանք է, նոր էսկալացիա: «Արմենպրես»-ի հետ զրույցում նշեց արաբագետ Արաքս Փաշայանը` մեկնաբանելով Սիրիայում տեղի ունեցող զարգացումները:
«Սա, ըստ էության, կարելի է անվանել ագրեսիա տարածաշրջանի, Սիրիայի դեմ: Ըստ ամենայնի, սիրիական հարթակը օգտագործվում է Ռուսաստանի և Իրանի դեմ: Սա լարվածության նոր ալիք է միջազգային հարաբերություններում: Բնականաբար, ցանկացած ագրեսիա, լարվածություն կարող է հանգեցնել պատասխան գործողությունների: Ամեն դեպքում, կարծում եմ, որ ռազմական գործողությունների հետագա ընդլայնումը կարող է և կասեցվել, հենց իրենք` դաշնակիցները, ձեռնպահ մնան` ուղղակի սա համարելով որպես նախազգուշացում: Բայց առաջիկայում, իհարկե, ճգնաժամի հանգուցալուծման մասին վաղ է խոսելը, ամեն ինչ կարծես բերում է նոր լարվածության ալիքի»,-ասաց Արաքս Փաշայանը:
Միացյալ Նահանգները, Մեծ Բրիտանիան և Ֆրանսիան ապրիլի լույս 14-ի գիշերը Սիրիայի դեմ ռազմական գործողություն են սկսել՝ այդ երկրին հրթիռային հարվածներ հասցնելով: Ռազմական գործողության սկսման պատճառ է դարձել ապրիլի 7-ին Դումա քաղաքում տեղի ունեցած միջադեպը, որտեղ համաձայն որոշ տեղեկությունների, կիրառվել է քիմիական զենք: ԱՄՆ-ը դաշնակիցների հետ Սիրիայում 110 հրթիռ է արձակել. հաղորդվում է երեք տուժածի մասին:
