Բոլիվիայում շուրջ 50 հազար մարդ է տուժել հեղեղումների պատճառով
Բոլիվիայում շուրջ 50 հազար մարդ է տուժել հեղեղումների եւ տեղատարափների պատճառով: Այդ մասին հայտնել է հանրապետության քաղաքացիական պաշտպանության փոխնախարար Կառլոս Բրուն:
«Շուրջ 50 հազար մարդ է տուժել եղանակային տարբեր երեւույթների՝ անձրեւների, հեղեղումների, գետերի վարարումների, կարկտահարության, ինչպես նաեւ ճանապարհների փլուզման պատճառով»,-նրա խոսքը մեջբերել է ABI գործակալությունը: Բրուն նշել է, որ առավել ծանր իրադրություն է ստեղծվել Բենիի եւ Տարիխի դեպարտամենտներում: Տուժածներին օգնություն ցուցաբերելու համար ներգրավվել են զինվորականներ:
Բոլիվիայում առատ տեղումների պատճառով հայտարարված է վտանգի նախավերջին՝ նարնջագույն մակարդակ: Բոլիվիացի օդերեւութաբանների կանխատեսումների համաձայն, անձրեւները կշարունակվեն առնվազն մինչեւ շաբաթվա վերջը, հաղորդել է ՏԱՍՍ-ը:
