«Հայաստանում այս անգամ ևս ազատ ընտրություն չեղավ». Արտակ Զեյնալյան
«Եթե սկսենք ասել, թե այս տարի որ իրավունքներն են խախտվել, ավելի հեշտ կլինի ասել, թե որոնք չեն խախտվել, ու երևի չգտնենք այնպիսի իրավունք, որ խախտված չլինի»,- այսօր լրագրողների հետ հանդիպման ժամանակ ասաց «Ելք» խմբակցության պատգամավոր Արտակ Զեյնալյանը:
Նրա խոսքով՝ բոլոր իրավունքները կարող են խախտվել, բայց եթե չկան այդ իրավունքների խախտման իրավական պաշտպանության միջոցները, անիմաստ է դառնում մյուս իրավունքների պաշտպանությունը. «Շատ մտահոգիչ է անձնական ազատության իրավունքի վիճակը Հայաստանում՝ կալանքները, ձերբակալությունները, պահման պայմանները քրեակատարողական հիմնարկներում: Անմարդկային վերաբերմունք է համատարած: Եթե անձը գտնվում է քրեակատարողական հիմնարկում, կարելի է ասել՝ արդեն անվիճելի է, որ նա ենթարկվում է անմարդկային վերաբերմունքի, այն պայմանները, որ կան, դրանք անմարդկային են»:
Ա. Զեյնալյանը նկատեց, որ անցնող տարին նաև ընտրական տարի էր. «Կուզեի առանձնացնել նաև ընտրական իրավունքի ընդհանուր խախտումը: Հայաստանում այս անգամ ևս ազատ ընտրություն չեղավ, որովհետև դրա բաղադրատարրերից մեկը խախտված էր՝ կամքի ազատ ձևավորումը: Եթե կամքի դրսևորման արձանագրման հետ կապված մենք մեծ խնդիրներ չունեցանք, ապա կամքն ազատորեն չի ձևավորվել, ընտրակաշառքը համատարած բնույթ է կրել, վարչական ռեսուրսը մեծապես ազդել է ընտրական կամքի ձևավորման վրա, միևնույն ժամանակ, քաղաքական ուժերն ազատության պայմաններում չեն գործել»:
Մանրամասները՝ 168.am-ի տեսանյութում:
