«ԿԺԴՀ-ն ունակ է միջուկային սպառնալիք դառնալ ԱՄՆ-ի համար». Կիմ Չեն Ըն
Զինված ուժերի զարգացումը ԿԺԴՀ-ին թույլ է տվել դառնալ մի պետություն, որն ունակ է անմիջականորեն միջուկային սպառնալիք ներկայացնել Միացյալ Նահանգներին:
Ինչպես դեկտեմբերի 22-ին հայտնել է Կորեայի կենտրոնական հեռագրական գործակալությունը, այս մասին հայտարարել է երկրի առաջնորդ Կիմ Չեն Ընը Կորեայի աշխատանքային կուսակցության սկզբնական կազակերպությունների ներկայացուցիչների ժողովում: «Մեր հանրապետության միջուկային զինված ուժերի սրընթաց զարգացումը վերջին ժամանակներս մեծ ազդեցություն է գործում համաշխարհային քաղաքականության կառուցվածքի եւ ռազմավարական իրադրության վրա:
Մեր հանրապետությունը վերածվել է ռազմավարական պետության, որն ունակ է անմիջական միջուկային սպառնալիք ներկայացնել ԱՄՆ-ին, եւ աշխարհում ոչ ոք դա չի կարող ժխտել»,- մեջբերում է գործակալությունը նրա խոսքը: Կիմ Չեն Ընը նաեւ ընդգծել է, որ ԿԺԴՀ-ն այս առաջընթացին կարողացել է հասնել՝ չնայած միջազգային պատժամիջոցներին, հաղորդել է ՏԱՍՍ-ը:
