Արթուր Մանուկյանը հերքում է իր և Սերգեյ Բագրատյանի միջև ծեծկռտուքի մասին լուրերը
ԱԺ «Ծառուկյան» խմբակցության պատգամավոր Արթուր Մանուկյանը հերքում է իր և նույն խմբակցության պատգամավոր Սերգեյ Բագրատյանի միջև ծեծկռտուքի մասին լուրերը: Ազգային ժողովում լրագրողների հետ զրույցում Արթուր Մանուկյանը հավաստիացրեց, որ նման բան չի եղել:
Անդրադառնալով դիտարկմանը, թե պատգամավորների միջև ընդամենը բարձր տոնով խոսակցություն է տեղի ունեցել, Արթուր Մանուկյանը պատասխանեց.
«Չեմ կարծում, որ Նաիրա Զոհրաբյանը նման բան է ասել: Ընդամենը քննարկում է եղել, առօրյա, գործնական քննարկում»:
Ճշգրտող հարցին, թե իր և Սերգեյ Բագրատյանի միջև ծեծկռտուք չի՞ եղել, Մանուկյանը պատասխանեց. «Իհարկե, ոչ: Նման բան չի եղել և չի էլ կարող լինել»:
Հարցին, թե խորհրդարանականներին հարի՞ր են, արդյոք, հայհոյախառն վիճաբանությունները, Արթուր Մանուկյանը պատասխանեց. «Եթե նման բան լիներ, հարիր չէր: Բայց նման բան չի եղել»:
Հիշեցնենք, որ խորհրդարանում դեկտեմբերի 20-ին տեղի ունեցած աղմկահարույց քվեարկությունից հետո, երբ ընդունվեց Դատական օրենսգրքում փոփոխություններ և լրացումներ կատարելու մասին օրենքի նախագիծը, «Ծառուկյան» խմբակցության պատգամավոր Սերգեյ Բագրատյանը դահլիճից դուրս գալու ընթացքում հայհոյել է նույն խմբակցության պատգամավոր Նապոլեոն Ազիզյանին, ով, չնայած այն հանգամանքին, որ «Ծառուկյան» խմբակցությունը որոշել էր չմասնակցել քվեարկությանը, կողմ էր քվեարկել նախագծին:
Ըստ լուրերի՝ դրանից հետո «Ծառուկյան» խմբակցության պատգամավոր Արթուր Մանուկյանը լսել է Նապոլեոն Ազիզյանի հասցեին հնչած հայհոյանքը և վրդովվել՝ հայտարարելով, որ Ազիզյանն իր հոր ընկերն է, ինչից հետո պատգամավորների միջև ծեծկռտուք է եղել:
