Վճռաբեկ դատարանի նախագահը ներկայացրել է նորանշանակ դատավորներին
ՀՀ նախագահի նոյեմբերի 30-ի հրամանագրով Վահե Միսակյանը նշանակվել է ՀՀ Շիրակի մարզի ընդհանուր իրավասության առաջին ատյանի դատարանի դատավոր, Գոռ Շահբազյանը՝ ՀՀ Կոտայքի մարզի ընդհանուր իրավասության դատարանի դատավոր, իսկ Ալֆրեդ Վարդանյանը՝ ՀՀ Լոռու մարզի ընդհանուր իրավասության առաջին ատյանի դատարանի դատավոր: Այս մասին տեղեկացրին ՀՀ դատական դեպարտամենտի արարողակարգի և հասարակայնության հետ կապերի վարչությունից:
Դեկտեմբերի 14-ին ՀՀ վճռաբեկ դատարանի նախագահ Արման Մկրտումյանը Վահե Միսակյանին, Գոռ Շահբազյանին, Ալֆրեդ Վարդանյանին ներկայացնելով համապատասխան դատարանների նախագահներին և դատավորներին, ընդգծել է նրանց մասնագիտական որակներն ու պատրաստվածությունը և հույս հայտնել, որ նորանշանակ երիտասարդ դատավորները նոր ավյուն ու եռանդ կներդնեն արդարադատության պատշաճ իրականացնման աշխատանքում, ինչպես նաև մեծ պատասխանատվությամբ ու նվիրումով կստանձնեն դատավորի բարձր կոչումը:
Միջոցառման ավարտին ՀՀ վճռաբեկ դատարանի նախագահ Արման Մկրտումյանը ՀՀ դատական դեպարտամենտի ղեկավար Կարեն Փոլադյանի, ՀՀ արդարադատության խորհրդի աշխատակազմի ղեկավար Շողեր Վարդանյանի մասնակցությամբ նշված դատարաններում անցկացրել է աշխատանքային խորհրդակցություն, որի ընթացքում անդրադարձ է կատարվել դատական համակարգի գործունեությանը վերաբերող առանցքային հարցերին:
