«Ոնց որ ընդունես օրենք՝ ընտանիքում կինն ամուսնուն ժպտալով դիմավորելու մասին». Գևորգ Պետրոսյան
«Համերաշխություն վերականգնելը ո՛չ օրենքով կարող է լինել, ո՛չ էլ օրենքով կարող է սասանվել»,- այսօր Ազգային ժողովում հայտարարեց «Ծառուկյան» խմբակցության պատգամավոր Գևորգ Պետրոսյանը՝ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման» մասին օրենքի նախագծի քննարկման ժամանակ:
Նրա խոսքով՝ դա օրենքով հնարավոր չէ կարագավորել. «Ոնց որ ընդունես օրենք՝ ընտանիքում կինն ամուսնուն ժպտալով դիմավորելու մասին, ծնունդներն այսինչ ռեստորանում նշելու մասին, և այլն: Դա օրենքի կարգավորման առարկա չէ: Ինչո՞ւ պետք է ոստիկանը ներս մտնի հայկական ընտանիք: Մենք հազիվ ենք ձերբազատվել սովետական թաղայինների ինստիտուտներից, հիմա ի՞նչ, փորձում եք վերականգնե՞լ դա»:
