«Ճիշտ չէ մեկնաբանել այն նախարարի կնոջը, ում հետ աշխատել եմ ավելի քան 10 տարի». Դավիթ Տոնոյան
Արտակարգ իրավիճակների նախարար, Պաշտպանության նախկին փոխնախարար Դավիթ Տոնոյանն այսօր լրագրողների հետ զրույցում ստիպված էր անդադառնալ Պաշտպանության նախկին նախարար Սեյրան Օհանյանի կնոջ` Ռուզաննա Խաչատրյանի աղկմահարույց գրառումներին:
Մասնավորապես, այն հարցին, թե ո՞ւմ նկատի ուներ Պաշտպանության նախկին նախարար Սեյրան Օհանյանի կինը՝ ասելով, թե խուսափել է ծառայությունից, Դավիթ Տոնոյանը պատասխանեց. «Ես չգիտեմ՝ հասցեատերն ով էր: Ճիշտ չէ մեկնաբանել այն նախարարի կնոջը, ում հետ աշխատել եմ ավելի քան 10 տարի»:
Դավիթ Տոնոյանը չի կարծում, թե Ռուզաննա Խաչատրյանի գրառումը Պաշտպանության նախարար Վիգեն Սարգսյանին է վերաբերում.
«Խոսքը գնում է անձնական գրառումների մասին, ես փորձում եմ այդ հարցին չպատասխանել: Խնդրում եմ՝ ինձ այդ հարցերն այլևս չտաք: Ես կարծում եմ, որ դա Վիգեն Սարգսյանին չի վերաբերում»: Ըստ նրա՝ բանակում չծառայած բոլոր պաշտոնյաների վերաբերյալ տվյալները բոլորին հայտնի են:
Ինչ վերաբերում է հարցին, թե պաշտպանության ոլորտի նոր օրենսդրությունը արդյո՞ք լուծում է արդարության խնդիրը, Դավիթ Տոնոյանը պատասխանեց, թե պաշտոնյաների տղաները եթե առողջ լինեն, կգնան առաջնագիծ:
«Ես համոզված եմ, որ ամեն ինչ արվելու է, որպեսզի հավասարություն ստեղծվի: Այս օրինագիծը լուծում է ոչ միայն ձեր նշած արդարության հարցը, այլ նաև ռազմաքաղաքական իրավիճակից ելնելով և ժամկետային զինվորական ծառայության պահպանման պայմաններում սա որոշակի կարգավորումներ է նախատեսում»:
Նա հավելեց, նախագծի հիմքը Սեյրան Օհանյանի օրոք է դրվել, նախկինում միշտ այդ մասին քննարկումներ անցկացվել են:
«Ես կասեի, որ Սեյրան Օհանյանը երևի ամենաուրախ մարդկանցից մեկն է լինելու, որ նման օրենսդրություն ընդունվի»:
Անդրադառնալով հարցին, թե արդյո՞ք մտավախություն չկա, որ տարեկտման վերացումը կհանգեցնի արտագաղթի տեմպերի աճին, Դավիթ Տոնոյանը պատասխանեց.
«Ես կարծում եմ, որ ՀՀ անվտանգության համար ոչ մտահոգ մարդիկ… էլ չշարունակեմ: Եթե կան այնպիսի մարդիկ, ովքեր երկրի անվտանոգության չապահովման պատճառով մեկնում են, իմ համար այդ խավն ընդունելի չէ»,- ասաց նա:
Նա համաձայն չէր այն տեսակետին, որ մարդիկ խուսափում բանակում ծառայելուց, գուցե խնդիրներ կան, գուցե անարդարության մթնոլորտն է պատճառը.
«Եթե անվստահություն կա, համենայնդեպս դա ոչ բանակի նկատմամբ է: Այս օրենսդրությամբ հնարավորինս փակվելու են բոլոր տարբերակները՝ խուսափելու ծառայությունից»,- եզրափակեց Դավիթ Տոնոյանը:
