Սերբիան իր բոլոր դիվանագետներին հետ է կանչել Մակեդոնիայից
Սերբիան իր բոլոր դիվանագիտական ներկայացուցիչներին հետ է կանչել Մակեդոնիայի մայրաքաղաք Սկոպիեից: Այդ մասին օգոստոսի 21-ին հայտնել է ազգային հեռուստատեսությունը՝ հղում անելով երկրի ԱԳ նախարարությանը:
Նշվում է, որ դեսպան Դուշանկա Դիվյակ Տոմիչը և դեսպանատան աշխատակիցներն անցած գիշեր ժամանել են Բելգրադ: Դիվանագետների հետկանչման պատճառ է նշվել շտապ կոնսուլտացիաների անհրաժեշտությունը:
Ավելի վաղ Սերբիայի դիվանագիտական ներկայացուցչությունը Մակեդոնիայի իշխանություններից պահանջել է ուժեղացնել դեսպանատան պահպանության անվտանգության միջոցները: Սպասվում է, որ ստեղծված իրադրության կապակցությամբ այսօր հատուկ հայտարարությամբ հանդես կգա Սերբիայի արտաքին քաղաքական գերատեսչության ղեկավար Իվիցա Դաչիչը, հաղորդել է ՏԱՍՍ-ը:
