Թուրքիան պետք է իր ձեռքերը հեռու պահի արցախյան հիմնահարցից. Էդուարդ Շարմազանով
ՀՀԿ խոսնակ Էդուարդ Շարմազանովը հուլիսի 20-ին կուսակցության ԳՄ նիստից հետո լրագրողների հետ զրույցի ընթացքում անդրադարձավ Թուրքիայի արտաքին գործերի նախարար Մևլութ Չավուշօղլուի՝ հայկական ուժերն Արցախից դուրս բերելուն առնչվող հայտարարությանը: Շարմազանովը փաստեց, որ Չավուշօղլուն մի երկրի ներկայացուցիչ է, որը ժխտում է Հայոց ցեղասպանությունը, որի պառլամենտում ազգային փոքրամասնություն ներկայացնող պատգամավորներին ծեծի են ենթարկում, ինչպես 100 տարի առաջ Գրիգոր Զոհրապին, մի պետություն է, որն օժանդակում է Ադրբեջանի հանցագործ, ահաբեկչական քաղաքականությանն Արցախի նկատմամբ:
«Թուրքիան պետք է իր ձեռքերը հեռու պահի արցախյան հիմնահարցից: Թուրքիան անելիք չունի այստեղ, և այդ երկիրը մի օր, ուզի, թե չուզի, պետք է ճանաչի Արցախի Հանրապետությունը, որպես միջազգային սուբյեկտ, որովհետև աշխարհը գնում է ինքնորոշման իրավունքի հաղթարշավի ճանապարհով: Եւ եթե խոսում է օկուպացիայից, պետք է օր առաջ դուրս բերի իր զորքերը օկուպացված Կիպրոսից, որն, ի դեպ, ԵՄ անդամ երկիր է»,- հավելեց Շարմազանովը:
