Բաժիններ՝

11 ֆիլմ, որ առաջարկում է դիտել Հրանտ Վարդանյանը

Երևանի փողոցներով թափառելուն, սրճարանում մեկ գավաթ սուրճ ըմպելուն, ընկերների հետ զրուցելուն և գիրք ընթերցելուն իր հմայքով չի զիջում կինոդիտումը: Լավ ֆիլմը միապաղաղ օրը (ինչ-որ ֆիլմեր՝ նույնիսկ ամբողջ կյանքը) իմաստավորելու և սիրով, գաղափարներով, ազատությամբ ու անկեղծությամբ լցնելու շնորհն ունի:

168.am-ի նախաձեռնած ֆիլմեր առաջարկելու գործընթացին այս շաբաթ միացել և իր սիրելի ֆիլմերով մեզ հետ կիսվել է «Արև» ֆիլմ ստուդիայի հիմնադիր տնօրեն, ռեժիսոր, իսկական էրևանցի Հրանտ Վարդանյանը:

«Բուրժուազիայի համեստ հմայքը» (Le Charme discret de la bourgeoisie) 

Իսպանացի կինոռեժիսոր Լուիս Բունյուելի կինոնկարն իրենից ներկայացնում է բուրժուական անարժեք կյանքի ծաղրական, սյուրռեալիստական էսքիզը: Ֆիլմում երազը և իրականությունը միահյուսված են խենթ իրադարձությունների խճանկարում:

Ֆիլմը կարող եք դիտել այստեղ

«Մոցարտն՝ ընդմիշտ» (For Ever Mozart) 

Ժան Լյուկ Գոդարի 1996 թվականին նկարահանած ֆիլմում բախվում են քաղաքականը և բանաստեղծականը, հավերժն ու ակտուալը: Գլխավոր թեման արվեստն է, թե որոնք են դրա աղբյուրները և ինչպիսին են գործողությունները: Ֆիլմը բաղկացած է 4 դրվագներից, որոնք ցույց են տալիս «արվեստի մարդուն»՝ սոցիալական և քաղաքական ցնցումներից պատառոտված ժամանակակից աշխարհի սուր իրավիճակներում:

Ֆիլմը կարող եք դիտել այստեղ

«Պիկասոյի արկածները» (Picassos äventyr) 

Ռեժիսոր Տագե Դենիելսոնի՝ Պաբլո Պիկասոյին նվիրված ֆիլմը սկսվում է նկարչի հետևյալ արտահայտությամբ. «Մայրս ինձ միշտ ասում էր. «Եթե դու զինվոր լինես, ապա գեներալ կդառնաս, իսկ եթե հոգևորական՝ անպայման քահանայապետ»։ Դրա փոխարեն՝ ես դարձա նկարիչ և Պաբլո Պիկասոն»:

Պիկասոյի կյանքի մասին պատմող ֆիլմը համեմված է հումորով: Ֆիլմի հերոսների շարքում կան կերպարներ, որոնք արտաքնապես նման են պատմական գործիչներին՝ Դալիին, Ապոլիներին, Գերտրուդ Սթայնին, Ալիսա Բաբետ Տոկլասին և ուրիշներին:

Ֆիլմը կարող եք դիտել այստեղ

«Թռիչք կկվի բնի վրայով» (One Flew Over the Cuckoo՚s Nest) 

1975 թվականին ռեժիսոր Միլոշ Ֆորմանի կողմից նկարահանված գեղարվեստական ֆիլմը Ռենդլ ՄակՄյորֆիի (Ջեք Նիկոլսոն) մասին է, ով բանտից տեղափոխվում է հոգեբուժարան, որտեղ տիրում են հոգեբուժարանի գլխավոր բժշկուհու՝ Ռետչեդի (Լուիզա Ֆլեթչեր) սահմանած կանոնները:

ՄակՄյորֆիին զարմացնում է, որ մյուս հիվանդները համակերպվել են ստեղծված իրավիճակի հետ, իսկ ոմանք նույնիսկ ինքնակամ են եկել հոգեբուժարան: Եվ նա որոշում է ապստամբել: Միայնակ:

Ֆիլմը կարող եք դիտել այստեղ

«Ծովը՝ ներսում» (Mar adentro) 

2004 թվականին ռեժիսոր Ալեխանդրո Ամենաբարի նկարահանած ֆիլմը հիմնված է իրական դեպքերի վրա: Այն պատմում է իսպանացի նախին ծովային Ռամոն Սամպեդրոյի (Խավիեր Բարդեմ) կյանքի վերջին երկու տարիների մասին, ով մոտ 30 տարի պայքարել է էվթանազիայի իրավունքի համար։ Ռամոնն ամբողջությամբ կաթվածահար էր՝ անընդհատ մահճակալի վրա պառկած:

Ֆիլմում ներկայացվում են նաև նրա և երկու կանանց միջև հարաբերությունները: Խուլիան (Բելեն Ռուեդա) նրա փաստաբանն է, իսկ Ռոզան (Լոլա Դուենյաս)՝ ընկերուհին, ով փորձում է համոզել Ռամոնին, որ կյանքը լավ բան է, և արժե դրա համար ապրել։ Ռամոնը, չնայած մահանալու ցանկությանը, իր ընկերներին և հարազատներին բացահայտում է կյանքի իմաստն ու արժեքները: Նա ինքը չի կարող շարժվել, բայց կարող է յուրաքանչյուրին ստիպել փոխել իր կյանքի ընթացքը:

Ֆիլմը կարող եք դիտել այստեղ

«Մեծ գեղեցկություն» (La grande bellezza) 

Քննադատների համաձայն՝ Իտալիայի 21-րդ դարի ամենատաղանդավոր կինեմատոգրաֆիստներից մեկի՝ իտալացի կինոռեժիսոր Պաոլո Սորրենտինոյի «Մեծ գեղեցկություն» ֆիլմը պատմում է արիստոկրատների, քաղաքական գործիչների, բարձր թռիչքի հանցագործների, լրագրողների, դերասանների, ազնիվ ընտանիքների անկումային ժառանգների, հոգևորականների, նկարիչների, իրական կամ երևակայական մտավորականների մասին, որոնց բոլորին կլանում է ժամանակակից Բաբելոնը, քանի դեռ նրանք կառուցում են փխրուն հարաբերություններ և անձնատուր են լինում կյանքի ունայնությանը:

Անտարբեր և հիասթափված 65-ամյա լրագրող և գրող Ջեպ Գամբարդելան (Տոնի Սերվիլլո), ով չի բաժանվում ջին-տոնիկով լի գավաթից, հետևում է այս դատարկ և կորուսյալ մարդկանց շքերթին:

Ֆիլմը կարող եք դիտել այստեղ

«Մաշկը, որի մեջ ես ապրում եմ» (La piel que habito) 

Իսպանացի ռեժիսոր Պեդրո Ալմոդովարի ֆիլմը պատմում է աշխարհահռչակ վիրաբույժ Ռոբերտ Լեդգարդի (Անտոնիո Բանդերաս) մասին, ով բացահայտել է մարդկային արհեստական մաշկի ստեղծման գաղտնիքը: Նա գործընկերներին վստահեցնում է, որ մկների վրա փորձարկումներ է իրականացնում, բայց գաղտնի կերպով իր ամառանոցում փակի տակ է պահում Վերա (Ելենա Անայա) անունով մի երիտասարդ կնոջ, ով էլ հանդիսանում է նրա փորձարկումների հիմնական օբյեկտը:

Ֆիլմը կարող եք դիտել այստեղ

«Օրենքն օրենք է» (La legge legge) 

«Օրենքն օրենք է» ֆիլմը նկարահանված է ֆրանսիացի կինոռեժիսոր և սցենարիստ Քրիստիան-Ժակի կողմից:

Բոլոր արկածները տեղի են ունենում Ասսոլա քաղաքում, քանի որ այն տարբերվում է մյուս բոլոր քաղաքներից: Քաղաքի միջով անցնում է Ֆրանսիայի և Իտալիայի միջև սահմանը, և քաղաքի ամբողջ կյանքը համակարգում է այդ փաստը: Ասսոլա քաղաքում կա գումար վաստակելու երկու եղանակ. կամ օրենքին ենթարկվելը, կամ օրենքից խուսափելը:

Ֆիլմի գլխավոր հերոսը՝ ֆրանսիացի մաքսային Ֆերդինանդ Պաստորելին (Ֆերնանդել) ապրում է համապատասխան առաջին եղանակին, իսկ իտալացի մաքսանենգ Ջուզեպպեն (Տոտո)՝ համաձայն երկրորդի: Բայց նրանց բաժանում է ոչ միայն օրենքը: Ինչպես միշտ, տղամարդկանց միջև այս բարդ հարաբերություններին խառնվում են կանայք: Այդ ժամանակ տղամարդիկ սկսում են բոլոր հնարավոր միջոցներով միմյանց վնաս պատճառել:

Ֆիլմը կարող եք դիտել այստեղ

«Ամարկորդ» (Amarcord) 

Կարմիր հագած էլեգանտ սենյորան համընդհանուր հիացմունքի և ցանկության օբյեկտն է: Ծխախոտի խանութի փարթամ կրծքերով տիրուհին՝ դեռահաս տղաների երևակայության գլխավոր հերոսուհին: Այս և բազմաթիվ այլ հրաշալի դրվագները կինեմատոգրաֆի լեգենդար վարպետի՝ Ֆեդերիկո Ֆելինիի հիշողություններն են, որոնք կենդանություն են առնում էկրանի վրա: «Ամարկորդ» բառը Ռիմինի քաղաքի բարբառով, որտեղ, ի դեպ, մեծացել է Ֆելինին, նշանակում է՝ «Ես հիշում եմ»:

Ֆիլմը կարող եք դիտել այստեղ

«Ուղևորները» (Passengers) 

Ռեժիսոր Մորթեն Թիլդումի ֆանտաստիկ մելոդրաման պատմում է «Ավալոն» տիեզերանավի մասին, որն ուղևորվում է ճանապարհորդության, որպեսզի մեկ այլ մոլորակում ստեղծի գաղութ: Ճանապարհորդությունը պետք է տևի 120 տարի։ Տիեզերանավում կան 5000 ուղևոր և 258 անդամներից բաղկացած անձնակազմը. նրանք բոլորը գտնվում են գիբերնացիայի մեջ։

Ամեն ինչ ընթանում է ըստ պլանի, բայց տիեզերանավի անսարքության պատճառով ուղևորներից երկուսն արթնանում են: Նրանք սարսափահար գիտակցում են, որ արթնացել են 90 տարի վաղ՝ մինչև տիեզերանավի վերջնակետին հասնելը, ինչը նշանակում է, որ կյանքի մնացած հատվածը նրանք պետք է միասին անցկացնեն…

Ֆիլմը կարող եք դիտել այստեղ 

«2001 թվականի տիեզերական ոդիսականը» (2001: A Space Odyssey) 

Նշանավոր կինոռեժիսոր Սթենլի Կուբրիկի կուլտային ֆիլմը մի շարք հարցեր է առաջ բերում. ո՞վ ենք մենք, ի՞նչ տեղ ենք զբաղեցնում Տիեզերքում: «Ս.Ս. Դիսքավերի» տիեզերանավի անձնակազմը՝ կապիտաններ Դեյվ Բոումենը (Կիր Դուլլի), Ֆրենկ Փուլը (Գարի Լոկվուդ) և նրանց HAL-9000 համակարգիչը պետք է ուսումնասիրեն Գալակտիկայի շրջանը և հասկանան՝ ինչո՞ւ են այլմոլորակայինները հետևում Երկրին: Այդ ճանապարհին նրանց սպասվում են շատ անսպասելի բացահայտումներ…

Ֆիլմը կարող եք դիտել այստեղ

ԱՆԻ ԳԱԲՈՒԶՅԱՆ

Բաժիններ՝

Տեսանյութեր

Լրահոս