«Լրագրողներ առանց սահմանների»-ն աջակցություն է հայտնել Թուրքիայում բանտարկված լրագրողներին
«Լրագրողներ առանց սահմանների» կազմակերպությունն ի աջակցություն Թուրքիայում բանտարկված լրագրողների նոր նախաձեռնություն է սկսել: Այս մասին հայտնում է թուրքական Demokrathabet.net-ը:
Կազմակերպության անդամները մայիսի 30-ին Ստրասբուրգում Մարդու իրավունքների եվրոպական դատարանի և Եվրոպայի խորհրդի շենքերի դիմաց սպիտակ սփրեյով հատակին պատկերել են Թուրքիայում բանտարկված լրագրողների նկարները: Նկարների տակ գրված է՝ «Փրկեք թուրք լրագրողներին»:
«Լրագրողներ առանց սահմանների» կազմակերպության գլխավոր քարտուղար Քրիստոֆ Դելոիրը միջոցառման մասին ասել է.
«Թուրքիան այսօր լրագրողների համար աշխարհի ամենամեծ բանտն է: Այս պահին արտակարգ դժվար պայմաններում, ոչ խելամիտ հիմնավորումներով կալանքի տակ է ավելի քան 100 լրագրող»:
Նախօրեին նմանօրինակ միջոցառում էր կազմակերպվել նաև Փարիզում: Կազմակերպությունը մամուլի ազատության ցուցիչով Թուրքիային 180 երկրների շարքում դասում է 155-րդ հորիզոնականում:
