Մահացել է Հունաստանի նախկին վարչապետ Կոնստանտինոս Միցոտակիսը
Կյանքի 99-րդ տարում վախճանվել Է Հունաստանի նախկին վարչապետ Կոնստանտինոս Միցոտակիսը, որ «Նոր դեմոկրատիա» հիմնական ընդդիմադիր կուսակցության ներկայիս ղեկավար Կիրիակաոս Միցոտակիսի հայրն է: Այդ մասին հայտնել է Աթենքի լրատվական գործակալությունը:
«Այսօր տեղական ժամանակով ժամը 01:00-ին մահացել է Կոնստանտինոս Միցոտակիսը՝ շրջապատված այն մարդկանցով, որոնք սիրում էին իրեն»,-ասված է նախկին վարչապետի ընտանիքի հաղորդագրության մեջ:
Կոնստանտինոս Միցոտակիսը 1977 թվականին ստեղծել է նոր լիբերալների կուսակցությունը, 1978 թվականին իր կուսակցության անդամների հետ միասին անդամագրվել է «Նոր դեմոկրատիայի» շարքերին, իսկ ավելի ուշ գլխավորել է այն: Հունաստանի վարչապետն է եղել 1990-1993 թվականներին: 1993 թվականի ընտրություններում պարտությունից հետո թողել է «Նոր դեմոկրատիայի» ղեկավարի պաշտոնը՝ դառնալով այդ կուսակցության պատվավոր նախագահը, հաղորդել է ՏԱՍՍ-ը։
