Հենրիխ Մխիթարյանը պատասխանել է Ջորկաեֆի շնորհավորանքին
Հայաստանի ֆուտբոլի ազգային թիմի և «Մանչեսթեր Յունայթեդ»-ի ֆուտբոլիստ Հենրիխ Մխիթարյանը շնորհակալություն է հայտնել Յուրի Ջորկաեֆից:
«Անչափ շնորհակալ եմ: Կարծես երեկ էր, որ նկարվեցինք: Հիմա ես հասել եմ իմ նպատակին, ինչպես դուք»,- Թվիթերի էջում Ջորկաեֆին պատասխանել է Մխիթարյանը:
Ավելի վաղ ֆուտբոլի աշխարհի և Եվրոպայի չեմպիոն Յուրի Ջորկաեֆը շնորհավորել էր Հենրիխ Մխիթարյանին Եվրոպայի լիգայում հաղթելու կապակցությամբ: «Այդ օրը (լուսանկարվելու օրը-հեղ.) դու ինձ ասացիր, որ մի օր կնվաճես գավաթը: Դու արժանի ես դրան, իմ ընկեր, շնորհավորում եմ»,-Թվիթերի իր էջում գրել էր Ջորկաեֆը:
Եվրոպայի լիգայի եզրափակիչում «Մանչեսթեր Յունայթեդ»-ը հաղթեց «Այաքս»-ին 0:2 հաշվով: «Կարմիր սատանաների» կազմում գոլերը խփեցին Պոգբան և Մխիթարյանը: Մխիթարյանն առաջին հայ ֆուտբոլիստն է, ով մասնակցում և գոլ է խփում եվրագավաթի խաղարկության եզրափակիչում:
