Հովհաննես Չեքիջյանը Ստամբուլում պարգևատրվել է
ԽՍՀՄ ժողովրդական արտիստ, ՀՀ արվեստի վաստակավոր գործիչ, խմբավար, Հայաստանի ազգային ակադեմիական երգչախմբի գեղարվեստական ղեկավար և գլխավոր դիրիժոր Հովհաննես Չեքիջյանի բազմաթիվ պարգևների թիվն ավելացավ ևս մեկով:
Ինչպես տեղեկացրին ՀՀ մշակույթի նախարարության հասարակայնության հետ կապերի բաժնից` մաեստրոն, ով հրավիրված էր ծննդավայր՝ Ստամբուլ, Սուրբ Վարդանանց եկեղեցում պարգևատրվել է Մաղաքիա պատրիարք Օրմանյանի անվան ոսկե շքանշանով, որը նրան է հանձնել Պոլսի պատրիարքարանի Վարդանանց դպրաց դաս երգչախմբի նախագահ Ծ. վրդ Թաթուլ Անուշավանը:
Հովհաննես Չեքիջյանը 1961 թվականից ապրում է Հայաստանում, այդ թվականից ղեկավարում է Հայաստանի պետական ակադեմիական երգչախումբը: Նրա ղեկավարությամբ կոլեկտիվը մեծ վարպետությամբ կատարում է համաշխարհային դասական երաժշտություն և ժամանակակից հայ կոմպոզիտորների ստեղծագործություններ, հայկական ժողովրդական երգեր։
Մաեստրոն ղեկավարում է նաև սիմֆոնիկ համերգներ: Հյուրախաղերով հանդես է գալիս արտասահմանում։ Հեղինակ է երաժշտական ստեղծագործությունների, այդ թվում և «Գարնանային անուրջներ», «Տոնական ձոն» վոկալ-սիմֆոնիկ պոեմների։
