«Մենակ էդ էր պակաս, որ գլխավոր ընտրակեղծարարն ինձ նկատողություն անի». Լևոն Զուրաբյանն ու Տիգրան Մուկուչյանը վիճեցին ՍԴ-ում
Այսօր Սահմանադրական դատարանում «Կոնգրես-ՀԺԿ» դաշինքի դիմումի հիման վրա՝ ԱԺ ապրիլի 2-ի ընտրությունների արդյունքներն ամփոփելու մասին ԿԸՀ-ի որոշումը վիճարկելու վերաբերյալ գործի լսումների ժամանակ հայցվոր կողմի ներկայացուցիչ Տիգրան Եգորյանն ավարտեց փաստարկների մանրամասն ներկայացումը, ապա դատարանում սկսվեց հարց ու պատասխանի փուլը։
Ի պատասխան Լևոն Զուրաբյանի դիտարկման, որ տեսախցիկներն անջատվել են ժամը 7-ից մինչև 1-ը, ԿԸՀ նախագահ Տիգրան Մուկուչյանը հայտարարեց, որ ընտրության մասնակից ուժերի գրասենյակներն ունեցել են մուտք տեսաձայնագրություններին։
Զուրաբյանը բարձրացրեց մատն ու հորդորեց չմիջամտել։
«Առանց մատի, առանց մատի»,- դժգոհեց Մուկուչյանը։
«Խնդրում եմ ինձ նկատողություններ չանել, թե ես ինչպես պետք է խոսեմ և ներկայացնեմ»,- վրդովվեց Զուրաբյանը։
Միջամտեց ՍԴ նախագահ Գագիկ Հարությունյանն ու կողմերին կոչ արեց ընդհատել և չպիտակավորել միմյանց։
«Մենակ էդ էր պակաս, որ գլխավոր ընտրակեղծարարն ինձ նկատողություն անի»,- շարունակեց Զուրաբյանը։
Գ.Հարությունյանը դիտողություն արեց, որ այդպես շարունակվելու դեպքում ստիպված կլինի Զուրաբյանին զրկել ձայնից։
Լ.Զուրաբյանը շարունակեց պատասխանել հարցերին և ներկայացնել իրենց դիրքորոշումը։
Տ.Մուկուչյանը վաղն իր ելույթում կներկայցնի ԿԸՀ դիրքորոշումը։
