«Հսկայական նշանակություն ունի Պարսից ծոցի ու Սև ծովի միջև Իրան-Հայաստան-Վրաստան կամ Իրան-Ադրբեջան-Վրաստան ուղեգծով կապի հաստատումը». Ջահանգիրի
Վրաստանի վարչապետ Գեորգի Կվիրիկաշվիլին ապրիլի 22-23-ին երկօրյա պաշտոնական այցով եղել է Իրանում, որտեղ բանակցություններ է վարել Իրանի նախագահ Հասան Ռոուհանիի, փոխնախագահ Իսհակ Ջահանգիրիի եւ Մեջլիսի իսլամական խորհրդատվական խորհրդի նախագահ Ալի Լարիջանիի հետ, տեղեկացնում է «Գրուզիա Online»-ը:
Ռոուհանին հայտարարել է, որ Թեհրանը ողջունում է Վրաստանի հետ հարաբերությունների զարգացումը բոլոր ոլորտներում: Հանդիպմանը Ռոուհանին եւ Կվիրիկաշվիլին հատուկ ուշադրություն են դարձրել տրանսպորտին եւ Պարսից ծոց-Սեւ ծով փոխադրամիջանցքին:
«Այդ ոլորտում Թեհրանի եւ Թբիլիսիի հարաբերությունների խորացումը կարող է օժանդակել տարածաշրջանի էական զարգացմանը»,-ասել է Ռոուհանին: Պարսից ծոց-Սեւ ծով փոխադրամիջանցքի հարցը քննարկվել է նաեւ Կվիրիկաշվիլիի եւ Էսհակ Ջահանգիրիի հանդիպմանը:
«Հսկայական նշանակություն ունի Հյուսիս-Հարավ փոխադրամիջանցքի հարցը եւ Պարսից ծոցի ու Սեւ ծովի միջև Իրան-Հայաստան-Վրաստան կամ Իրան-Ադրբեջան-Վրաստան ուղեգծով կապի հաստատումը»,- Tehran Times-ի փոխանցմամբ՝ ասել է Ջահանգիրին:
Իրանի փոխնախագահի խոսքով՝ Թեհրանն արդեն այն բանի պատրաստակամություն է հայտնել, որ Պարսից ծոցը Սեւ ծովի հետ կապվի Հյուսիս-Հարավ փոխադրամիջանցքով, որն այդ ուղեգծերով միմյանց հետ կկապի Վրաստանը, Հայաստանը, Ադրբեջանը եւ Իրանը:
Կվիրիկաշվիլիի վարչակազմի մամուլի տեղեկագրի համաձայն, իրանական կողմը Վրաստանի հետ համագործակցելու պատրաստակամություն է հայտնել էներգետիկայի ոլորտում, այդ թվում՝ էլեկտրականության փոխանակման եւ Վրաստանին իրանական գազի մատակարարման հարցերում:
Վրացական պատվիրակության կազմում ընդգրկված էին նաեւ էներգետիկայի նախարար Կախա Կալաձեն, արտաքին գործերի նախարար Միխեիլ Ջանելիձեն, էկոնոմիկայի նախարար Գեորգի Գախարիան եւ այլ պաշտոնատարներ:
