Ֆրանսիայի նախագահի թեկնածուների հեռուստաբանավեճերը կանցկացվեն ապրիլի 20-ին
France-2 պետական հեռուստաալիքը Ֆրանսիայի նախագահի բոլոր 11 թեկնածուների մասնակցությամբ բանավեճերի հեռարձակումը կիրականացնի ապրիլի 20-ին: Այդ մասի հայտնել է AFP գործակալությունը:
Նրա տեղեկատվության համաձայն, բանավեճերը կսկսվեն տեղական ժամանակով ժամը 20:00-ին (Երեւանի ժամանակով ժամը 22:00-ին):
Ավելի վաղ ԶԼՄ-ներում տեղեկատվություն էր հայտնվել այն մասին, որ ապրիլի 20-ին նշանակված հեռուստաբանավեճերը կչեղարկվեն այն բանից հետո, երբ երկրի բարձրագույն պաշտոնի հավակնորդներից մի քանիսը հայտարարեցին, որ դրանց չեն մասնակցելու:
Այսպես, «Հառաջ» շարժման առաջնորդ Էմանուել Մակրոնը հայտարարեց, որ ճիշտ չի համարում բանավեճերն ընտրությունների առաջին փուլի ամսաթվին այդքան
մոտ անցկացնելը, որը նշանակված է ապրիլի 23-ին: Հետագայում համանման դիրք բռնեց նաեւ «Ազգային ճակատ»ի առաջնորդ Մարին լե Պենը, ինչպես նաեւ մի շարք այլ քաղաքական գործիչներ:
Ֆրանսիայի Հանրապետության ղեկավարի պաշտոնի հավակնորդների առաջին բանավեճերը, որոնք անցկացվել են ապրիլի 4-ին, դիտել են 6,3 մլն հեռուստադիտողներ:
Ֆրանսիայում նախագահական ընտրությունների երկրորդ փուլը կկայանա մայիսի 7-ին: Հասարակական կարծիքի հարցումները վկայում են, որ երկրորդ փուլի առավել հավանական թեկնածուներն են Էմանուել Մակրոնը եւ Մարին լե Պենը, հաղորդել է ՏԱՍՍ-ը:
