«ՌԴ-ն հուսով է, որ ԱՄՆ-ը ԿԺԴՀ-ում չի ձեռնարկի նույն այն գործողությունները, ինչը և Սիրիայում». Լավրով
Ռուսաստանը հուսով է, որ ԱՄՆ-ը ԿԺԴՀ-ի նկատմամբ միակողմանի գործողություններ չի ձեռնարկի, ինչպես դա վերջերս եղավ Սիրիայի հետ: Այդ մասին հայտարարել է ՌԴ ԱԳ նախարար Սերգեյ Լավրովը՝ մեկնաբանելով ԱՄՆ-ի փոխնախագահ Մայքլ Փենսի հայտարարություններն այն մասին, որ Փենյանի նկատմամբ «ռազմավարական համբերության» դարաշրջանն ավարտվել է, տեղեկացնում է ՏԱՍՍ-ը:
«Մենք չենք ընդունում ՄԱԿ-ի ԱԽ-ի բազմաթիվ բանաձեւերը խախտող Փենյանի արկածախնդրական հրթիռամիջուկային գործողությունները, բայց դա բնավ չի նշանակում, որ կարելի է նույն կերպ խախտել միջազգային իրավունքը՝ ուժ կիրառելով ի
խախտումն ՄԱԿ-ի Կանոնադրության,ընդգծել է Լավրովը:
Մեծապես հուսով եմ, որ այնօրինակ միակողմանի գործողությունները, որոնք մենք վերջերս տեսանք Սիրիայում, չեն լինի, եւ որ ԱՄՆ-ը կհետեւի այն ուղեգծին, որը նախագահ Դոնալդ Թրամփը քանիցս հնչեցրել է իր նախընտրական արշավի շրջանում»:
Իր հերթին Կրեմլը կրկին հորդորել Է բոլոր կողմերին՝ զսպվածություն ցուցաբերել Կորեական թերակղզու շուրջ ստեղծված իրավիճակում: Այդ մասին հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով հաղորդագրություններն այն մասին, թե ԱՄՆ-ը եւ Հարավային Կորեան խոստացել են արդյունավետ պատասխան տալ ԿԺԴՀ-ի ռազմական սադրանքներին՝ պայմանավորվելով Հարավային Կորեայում հնարավորինս շուտ ծավալել ամերիկյան THAAD հակահրթիռային համակարգը:
«Մեր դիրքորոշումը լավ հայտնի է եւ հետեւողական: Մենք զսպվածության կոչ ենք անում բոլոր կողմերին, հորդորում ենք բոլոր կողմերին՝ խուսափել այնպիսի գործողություններից, որոնք կարող են որպես սադրանք որակվել: Եվ մենք հանդես ենք գալիս հյուսիսկորեական խնդրի կարգավորման առկա ձեւաչափերում կոորդինացված միջազգային ջանքերը շարունակելու օգտին»,-ասել է Պեսկովը:
