Ավստրալիայում շնաձուկը հեղեղման զոհ է դարձել
Շնաձուկը Ավստրալիայի հյուսիս արեւելքում մոլեգնած «Դեբի» ցիկլոնի առաջացրած հեղեղման զոհն է դարձել։
Գիշատիչը մտել է ջրով ողողված տարածք, բայց չի կարողացել օվկիանոս վերադառնալ, երբ հեղեղումը հետ է քաշվել: Տեսագրությունը հրապարակել է BFMTV-ն:
Կենդանուն, որի երկարությունը շուրջ մեկ մետր է, տեղացի բնակիչները հայտնաբերել են Քվինսլենդի նահանգի գյուղական ճանապարհներից մեկին՝ օվկիանոսի ափից հեռու:
Ավստրալիայի Նոր Հարավային Ուելսի նահանգի կառավարությունը հինգ հյուսիսային շրջաններ, որտեղ հեղեղումներ են տեղի ունեցել, տարերային աղետի գոտիներ է հայտարարել: Անցած երկու օրվա ընթացքում երկրի արեւելքում անդադար տեղատարափ անձրեւներ են տեղացել, ինչը հանգեցրել է շատ գետերում ջրի մակարդակի կտրուկ բարձրացման: Դրա հետեւանքով Լիսթեր, Չինդերա, Մուրվիլումբա, Քինգսլի, Բինլի քաղաքներում, Գոլդ Քոստի մի շարք շրջաններում վերջին 24 ժամում տեղացել է ավելի քան 400 միլիմետր անձրեւ եւ տեղի են ունեցել հեղեղումներ:
Ինչպես հայտնել է Քվինսլենդի կառավարության ղեկավար Անաստասիա Պալաշչուկը, այդ նահանգում մոտավորապես 130 հազար տուն մնում է առանց էլեկտրականության: Քվինսլենդի եւ դրան սահմանակից Նոր Հարավային Ուելսի շրջանների տասնյակ հազարավոր բնակիչներ տարահանվել են եւ մինչ այժմ չեն կարողանում վերադառնալ իրենց տները։
