Ֆրանսիայի նախագահի թեկնածու Ամոնը դատապարտել է Միսաք Մանուշյանի կիսանդրիի պղծումը
Ֆրանսիայի Սոցիալիստական կուսակցությունից նախագահի թեկնածու Բենուա Ամոնը դատապարտել է Մարսելում Միսաք Մանուշյանի կիսանդրիի պղծումը:
«Ամոթ նրանց, ովքեր պղծել են Միսաք Մանուշյանի հուշարձանը: Նա և նրա ընկերները գնդակոծվել են նացիստների կողմից Ֆրանսիայում»,- թվիթերյան իր էջում գրել է Ֆրանսիայի նախագահի թեկնածուն և գրառման ներքո տեղադրել Մանուշյանի խմբի լուսանկարը:
Honte à ceux qui ont profané la stèle de Missak Manouchian. Lui et ses camarades fusillés par les nazis étaient la France. #AfficheRouge pic.twitter.com/5ZGJvECbOk
— Benoît Hamon (@benoithamon) February 15, 2017
Միսաք Մանուշյանի կիսանդրիի պղծումն ավելի վաղ խստորեն դատապարտել էր Ֆրանսիայի Ազգային ժողովի պատգամավոր Անրի Ժիբրայելը: Ժաբրայելը նաև պահանջ է ուղղել Ֆրանսիայի նախագահ Ֆրանսուա Օլանդին, վարչապետ Բեռնար Կազնյոֆին և ներքին գործերի նախարար Բրունո լը Ռուին ոչ միայն բացահայտել և պատժել այս անընդունելի արարքի հեղինակներին, այլև Մանուշյանի խմբի մասունքները տեղափոխել պանթեոն: 
Խնդրի առնչությամբ Ֆրանսիայի ներքին գործերի նախարար Բրունո լը Ռուին նույնաբովանդակ նամակ է հղել նաև պատգամավոր ՄարիԱրլեթ Կառլոտին:
Ֆրանսիայի նախագահի պաշտոնի համար Ամոնի հիմնական մրցակիցներն են «Հանրապետականներ» կուսակցությունը ներկայացնող նախկին վարչապետ Ֆրանսուա Ֆիյոնը, «Առաջ» շարժման առաջնորդ, էկոնոմիկայի նախկին նախարար Էմանուել Մակրոնը և «Ազգային ճակատ» կուսակցությունը ներկայացնող Մարին Լե Պենը: Նախագահական ընտրությունների առաջին փուլը Ֆրանսիայում կանցկացվի ապրիլի 23-ին, երկրորդ փուլը` մայիսի 7-ին:
