«Այսօրվանից Հայաստանում սկսվում է մեծ պատերազմ». Լևոն Զուրաբյան
«Այսօրվանից Հայաստանում սկսվում է մեծ արշավ, մեծ պատերազմ, մի կողմից` փողի, միյուս կողմից՝ քաղաքական մտքի և արդարության միջև: Սա է լինելու առաջիկա ընտրությունների գլխավոր ինտրիգը: Փողը և արդարությունը պատերազմելու են: Սա իրականում, եթե ուզում եք, լինելու է ընտրություն մամոնայի և Աստծո միջև: Արդարանալու իրավունք ոչ ոք չունի, թե՝ միևնույնն է՝ վերցնենք, կամ չվերցնենք ընտրակաշառքը, իրենց ուզած արդյունքներ են ստանալու: Ո՛չ»,- այսօր ԱԺ բրիֆինգների ժամանակ հայտարարեց ՀԱԿ խմբակցության ղեկավար Լևոն Զուրաբյանը:
Ըստ նրա` արդեն սկսվել են անձնագրային տվյալների լայնածավալ հավաքագրումներ, որն արվում է այն նպատակով, որ ընտրողների վրա ազդեցություն գործածվի` կաշառքի, վարչական ճնշումների կամ այլ տարբերակներով: Բայց միևնույնն է, ինչպես նշեց Լ. Զուրաբյանը, այն նվաճումները, որ մենք ունենք՝ ի դեմս ստորագրված ցուցակների հրապարակման և տեսախցիկների տեղադրման, ուրիշի փոխարեն քվեարկություն չի լինելու, քվեարկելու են միայն դրա իրավունքն ունեցող ընտրողները:
Լ.Զուրաբյանն ընդգծեց, որ այս ԱԺ ընտրություններն ավելի կարևոր են, քան նախագահական ընտրություններն անցյալում, քանի որ 5 տարվա համար ձևավորելու են ՀՀ ամբողջ իշխանությունը:
Հարցին, թե Գագիկ Ծառուկյանը քաղաքականություն է վերադարձել Սերժ Սարգսյանի «դաբրոյով», Լ.Զուրաբյանը չցանկացավ պատասխանել՝ ասելով, որ չի ցանկանում շահարկել, ենթադրություններ անել. «Մեր ժողովուրդը շատ լավ զգացողություն ունի և այդ հարցի պատասխանը կարող է տալ միայն ինքը»:
Անդրադառնալով ՀԱԿ-ի ցուցակին` Լ.Զուրաբյնաը հայտարարեց, թե իրենց ցուցակը երևի միակ ցուցակն է, որ ամեն ինչ նորմալ է:
